Вай гьантрай Москавлив Аьрасатнал Федерациялул советрал сенатортурал – Илияс Умахановлул ва Аьрасатнал Виричу Виктор Бондаревлул «За помощь и милосердие» тIисса медальлу дуллунни хIакьинусса кьини хасъсса аьралий операциялий хьхьичI ххуттай талатисса аьралийтуран ка-кумаг буллалисса хIакьсса патриотътуран ва волонтертуран.
Бюхттулсса наградалун лайкь хьуминнавух бия Дагъусттаннал бакIчинал кумагчи МахIаммад ХIажимахIаммадов ва хасъсса аьралий операциялий Ватандалул мурадру буручлай къучагъшиврий жан дуллусса Вагьаб Багьауттиновлул кулпат Майсарат.
ДакIнин бутанну, МахIаммад Оьмаров ва Майсарат Багьауттинова чIявучин кIулшиву ччя-ччяни хасъсса аьралий операциялийсса аьралитуран кумаг буллалаврийну.
МахIаммад Оьмаров цалчинсса гьантрая айивхьуну, гуманитар кумаг цачIун буллай ва ми хьхьичI ххуттай талатисса аьралийтурачIан биян буллай ур. Ванан щиннияргу ххуйну кIулли ссах мюхтажну буссарив ва ци тIалавшиннарду дуссарив жула аьралийтурал.
Наградалун лайкь хьусса жула лаккудуш Майсарат Багьауттинова хIакьсса патриот бур. ЧIалай дур ванил дуллалисса давуртту аьралийтураха аякьалийсса ва дакIнийхтунусса душиву. Ванил цила дакI рахIат дуккан даву мурадрай, ласнал аьпалун хас бувну, аьралийтуран янна дурухлахисса «Zов героев» тIисса цех тIивтIуну бур. Ва цехраву Майсарат бур аьралийтуран гъилисса гъухъри, ссурссу ларкьусса, дахьра ца лажин чIалачIисса, куклусса кьяпри ва уттубишай чуваллу бурухлай. Майсарат цуппагу цIанихсса модельер-конструктор бур. Хасъсса аьралий операция байбивхьуния шийнмай ласнал цинма пиш-каш бувсса янна дуруххай машиналий аьралийтуран янна дурухлай бур. ЦIана ванил цех гьарта-гьарза хьуну бур.
Цуппа ттучаннайх лавгун, чурххан тIааьнсса, кIукIлусса яннарду дурчIуну, буруххай ванил аьралийтуран гьухъри ва термобелье. Гьухъри буруххансса янна машан ласун ванин кумаг буллай бур хасъсса аьралий операциялий аьпалул хьусса аьралийтурал ниттихъул ва кулпатру. Акциярттан хъунмур харж буккан буллай, мудан чIарав ацIлай ур ванил ласнал уссу Халимбаг Багьауттиновгу.
Майсаратлун кумаг буллай бур ванил душ Мисайгу. Дарсирдая бучIайхту тIайланма лагай цехравун.
Ниттил ва душнил дурурххусса яннардайн лачIун дурну дур «Zoв героев» тIисса бренд.
ЧIавасса оьрмулий хасъсса аьралий операциялул гьурттучитуран чялишну кумаг баврихлу ва жяматийсса иширттавух гьуртту шаврихлу Мисай лайкь хьуну бур Сергей Меликовлул чулухасса Барчаллагьрал чагъарданун.
