– Ина «ЧIавалачин» журналданийн подписка дував?
– Му уттигу итабакьлай буссарив?
– «ЦIубарз» журналданийн дував?
– Мугу буссарив? «Зунттал хъами» тIисса журнал бушиву кIулли, буттарссичIа ккавккунни.
Щукрурхха ва къажагьилсса инсаннан «Зунттал хъами» журналданиявагу хавар бусса. Бунияларив, уттигъанну «ЧIавалачин» журналданул редактор Сиянат ХIажиевал дурсса, бувагу 50 зкземпляр чивчуну бур, подпискалун кумаг бувара тIисса, аьратталсса оьвчаву социал сетирдай кунначIан кув гьан дуллай булувкьуну бия. КIия-шама инсаннал хасну ттучIангума оьвкунни, цукун дувантIиссар подписка тIий. Цилва Сиянатлулгу ччясса мутталий чIарав бавцIунни, подписка дузал дунни тIий, барчаллагь увкунни. Гьаннайсса, лакрал дакIурдивунсса гужсса кьутIлил баймур бунни, хIасиллугу хьунни. Хьхьу-кьини буссар социал сетирдай, хасну вотсап группардаву лакку маз ябан аьркиншиврия буслайгу, чичлайгу. Дуссар лозунгру, хъазамрал улттуйх заккунттугу бишлай, «ххирассар ттун лакку маз!» тIисса мукIрушиннарду.
Ва иширай чIурчIав дунни хIурмат бусса чичу ХIадисхъал ХIадислулгу, лакку маз ябавриха зузиссару тIисса буцири группарду бунува, подписка дуллай бакъар тIий, багьавай аьй дуллай. Зат бакъар, ми ккуранну, группарду лакку мазрайсса гъалгъавагу буван бикIанссар. Лакку мазрайсса гъалгъа бушивува пайда бушиврун ккалли байсса замана бувкIун бур. Нигь рутлатимур вари. Циванни школардал директортурал ва лакку мазрал дарсру дишайсса учительтуралвагу, Сиянат леххаву тIутIи къабувну, цалва оьрчIан литературалул журналлу къачичайсса? Нину-ппу чантI къаувкусса бухьурча, учительтал, дирекциягурив къулагъас дакъасса бикIан аьркинсса. ТтучIан ттучIанма оьвтIун бикIай, оьрчIансса лакку мазрахасса, буттал кIанттухасса, Дагъусттаннахасса назмурду ххал дувача, гьан дувакьай тIий. ТачIав инсаннахьхьун на библиотека ягу архив бакъара къаувкуссар. Шаймур бувссар, лякъин хIарачат бувссар. Уттигу, кIу къабивзун буванна шайсса кумаг лакку маз яшаврил ххуллий. Амма, зулла канилу, итталу ми назмурдугу, оьрчIансса лакрал литературагу мудангу дикIаншивруллагу бучIирхха школардайн, садикирттайн журналлу тIалав буван.
«Лакрал районнай 36 школа буссар. Гьарца школалул ххю-ххюва журнал чичирчангума 180 экземпляр хъанай бур», — тIий ур халкьуннал чичу Мирза Давыдов. ХIукуматрал кабакьу бакъар учин къахьунссар, бурхха миллатирттал мазурдийсса журналлу, кказитру, театр, радио-телевидение. Гьар шинах, подпискалул чIун гъан хъанан дикIайхту, жугу подписка дуваракьай тIисса чIатIалтрайн кIурабаяру. Мяйжанссар, цивппа хьхьичIунмай хьуну, дуллалиссагу чансса бакъар. Миллатрал маз ябаврил ххуллий чIатIалтрайн кIурабаявугу оьккишиву дакъар, лахъунигума кьамул банну. Жул хъунмур буруккин цамур бур. Подписка дузал хьурчангу, кказит-журналлу ккалаккими цукун ябанну, лакку мазрай буккин-чичин кIулми ялу-ялун чан хъанахъисса чIумал тIисса. Гьарцагу экземплярданул заллу уну ччай буру, буккулт буну ччай буру, гьамин. Щаллу-ккурккисса лакку кказитрайгу, журналданийгу буккинмур бакъа къабикIайссар лаккучура тIисса инсаннан. Ккаларчанни кказитирттайгу, журналлайгу мюнпатмур лякъинтIисса.
Цамур цичIав бакъахьурчангу, миллатрал кказит-журналлу канил бугьансса цIакьсса хIучча – цалсса лакку мазрайсса кказит-журналлу дунияллийн буклай бушивур. Муниятуру жугу, подписка дувара тIий, миннатру буллай хъирив буклакисса.
Подпискалиясса ихтилат тани хъунама редакторнал хъиривчуну зий ивкIсса шаэр, ХIасан КIуруховлул, аьпа бивул, къуртал бувна укунсса мукъурттийну: «Чичараяртал зунма зулва миллатрал кказит!». Вай махърура нагу хIакьину тикрал буллалисса. Зулва кказит-журналлу ябуваншиврул хIакьину зуяту аьркинсса цалчинмур кумаг – подписка давур.
ПатIимат Рамазанова
