Райондалул бакIчи Зураб Куччаев ивунни Буршиял шяравун.

Ванащал бия райондалул бакIчинал хъиривчу Малик ХIусманов, кумагчи АхIмад Будайчиев, Депутатътурал Мажлисрал хъунама Явсупи ХIамзаев, идарарттал каялувчитал.
Шяраваллил бакIчи Амсар МахIачевлул, шяравух экскурсия буллай бунува, делегациялун ккаккан дунни дузрайн дурксса
проектру, бувсунни хьхьичI бивхьусса мурадирттая. Миннува ца яла агьамсса кIанттай ккавккунни шяравун интернет дуцаву ва мобил связьрал вышкарду дишаву.
Шяраву бан дакIний бусса бур ттизаманнул тIалавшиннардацIун бавкьусса спорткомплекс, шяраваллил инфраструктура хьхьичIуннай даврил ва жагьилтурал оьннасса чIун дуцIин дансса чаранну хIисаврай.

ФАП-райн бивну, ххал дурунни дузалшиндарал ва агьалинан медициналул кумаг баврил шартIру,
КIицI лавгунни чIярусса сиптарду ва проектру чулийн дуклай душиву шиччасса Ислам МахIачевлул кабакьулийну.
ЧIиримур ватан хьхьичIуннай даврил ххуллий ванал бихьлахьисса захIмат лавайсса кьиматрай кIицI лавгунни шяраваллил ва райондалул вакилтурал.
«Архсса ва лахъсса зунттал кIанттайсса шяраваллу хьхьичIуннай даву – шиккусса оьрмулул, даврил ва дунияллущалсса дахIаврил шартIру дузал даву райондалул хьхьичIунсса ххуттай буссар. Ххари хьунсса иш бур вай мурадру чулийн букканшиврул властьрал ва чялишсса шяравучутурал хIарачатру цачIун буллай бушиву», – увкунни Зураб Куччаевлул аьрххилия махъ.