Райондалул администрациялул бакIчи Зураб Куччаевлул каялувшиндаралу хьунни шяраваллаву спорт хьхьичIуннай даврин хас дурсса батIаву. Ваний гьуртту хьунни райондалул бакIчинал хъиривчу Малик ХIусманов, Гъумучиял ОьрчIал ва чIава жагьилтурал спортшколалул тренертал, физкультуралул дарсру дихьлахьисса учительтал.

Яла агьамсса масъала бия Гъумучиял ОьрчIал ва чIава жагьилтурал спортшколалий тренировкарттал шартIирдайн багьайсса.
Ххал бивгьунни спортшкола цIу буккан баврийн, материал-техническая база цIакь баврийн, спортрал инвентарь дузал даврийн ва чIава спортсментуран мюхчансса ва лябуккусса шартIру дузал даврийн багьайсса масъалартту. Хаснура къулагъас дурунни шяраваллаву спортрал оьрму чантI учин баврих.
«Спорт хьхьичIуннай даву, хаснура оьрчIалсса – жула райондалул бучIантIимунил ххуллийсса инвестицияр. Жура аьркинссар хIасул дан райцентрданий ялапар хъанахъиссаннангу, архсса шяраваллаву ялапар хъанахъиссаннангу цасса шартIру», – увкунни райондалул бакIчинал.
БатIаврил хIасиллайн бувну жаваблувсса инсантурайн тапшур бунни хIадур бан спортшколалул материал-техникалул база цIакь бансса маслихIатру. Ванил ялув ацIан тапшур бунни Малик ХIусмановлуйн.

Зулайхат Тахакьаева