Гьарца шинах январьданул 27-нний Аьрасатнаву шай «Блокадный хлеб» цIанилусса акция. Ванивух, муданна кунна, гьуртту хьунни лакрал щархъурдугу, дакIнин дуртунни Буттал кIанттул цIанийсса Хъунмасса дяъвилул ца яргмур, цIанихмур лажинну хъанахъисса Ленинградуллал блокада.
Ленинград фашистътурал блокадалуща тархъан бувну 82 шин шаврин хасну Гъумучиял дянивмур даражалул школалий хьунни «Непокоренный Ленинград» тIисса батIаву.
– Жун аьркинну бия оьрчIан ккаккан буван, захIматшивуртту духIан багьсса чIумал, инсантураву гуж цуксса ххишала шайссарив, цукун цачIун шайссарив, – тIий бур школалул директор Соня Макьаева.
ШавкIрав «Блокадалул ччатI» тIисса акция хIадур дурну дия ЦТКНР-лул ва библиотекалул зузалтрал. Вайннал дуллалисса давривух гьуртту хьунни шяраваллил школалул дуклаки оьрчIругу.
Щаравгу, библиотека ва школа цачIуну, хьунни мукуннасса акция. Школалий дунни «Непокоренный Ленинград» ва «Блокадный хлеб – символ жизни и надежды» тIисса классрал ссятру. Шикку оьрчIахь бувсунни тай гьантрай Ленинград шагьрулийсса инсантурал дурхIуцири аьзав-аькьуварттая.
Вара журалийсса батIавуртту хьунни райондалул цайми щархъавугу.
Бадрижамал Аьлиева
