Тарихраву агьамсса кIану бувгьусса Ленинград шагьрулул блокадалул ахир хьуния шиннай 82 шин шаврин хас дурсса кьинилуцIун дархIусса мероприятие хьунни Ккуллал райондалийсса Ваччиял шяравусса Культуралул ва досуграл центрданий.
Шикку гьуртту хьунни дуклаки оьрчIру ва Ваччиял шяраваллил жямат. Центрданул зузалтрал хIадур дурну дия «Блокадалул ччатI» тIисса цIанилусса, Буттал кIанттул цIанийсса Хъунмасса дяъвилул яла къучагъмур ва захIматмур лажин хъамакъаритаву мурадрайсса мероприятие.
Ваний гьурттухьуцириннан буллуна «Блокадалул ччатI». Блокадалул чIумал 125 грамм дусса ччатI булайсса бивкIссар ца бакIран. Ва чIивисса ччатIул парча хъанахъиссар, тай захIматсса чIунну дурхIусса инсантурал кьянкьашиврул ва чувшиврул лишанну.
Ленинградуллал блокадалиясса дакIнин бичавурттая, вайннан ккавкмуния бувсуна Центрданул художествалул каялувчи Асият МахIаммадовал.
–1941 шинал сентябрь зурул 8-нний дайдирхьуссар Ленинградуллал блокада. Гитлердул чапхунчитурал хъунисса хияллу бивкIссар шанма-мукьва зурул мутталий щалла жула хIукумат кIунттихьхьун ласунсса. Ккашил ва дякъил кьатI бувну най бивкIссар щаллусса кулпатру. Гьантлун ца бакIран ккаккан дурну диркIссар 125 грамм ччатIул, мугу ниттихъал цалва къабувкуну, оьрчIан булайсса бивкIссар. 900 гьантлий Ленинградуллал агьлу бивкIссар душманнал шалклул лагма рургьун, цукунчIавсса дуки-хIачIия ласун къахъанай азурда хьуну. ЛичIи-личIисса хIисаврттайн бувну, блокадалул ппурттуву оьрмурдацIа хьуну бур 600 азарунния 1,5 миллиондалийн бивсса инсантал, вайннава чIявумигу ккашил ливтIусса бур.
Жула халкьуннал чувшиву ялтту дурккуну, виричуну дурхIуссар тай яла захIматми чIунну. Шинну циксса гьарчангу, тачIавгу хъамакъаритантIиссар жунна Буттал кIанттул цIанийсса Хъунмасса дяъвилул ца яла захIматми чIунну. Къабювхъуссар душманнаща ник рищун бан жула чиваркI, – увкуна ванил.
Ленинградуллал агьалинал лархъусса захIматсса кьинирдая бувсуна Хъун дяъвилул ветераннал кулпат Нурижат Муслимовал ва захIматрал ветеран ПатIима Гуйдалаевал.
Дуклаки оьрчIру личIлулну вичIи дирхьуну бия блокадалул тарихрая бусласисса ихтилатирттах.
Имара Саидова
