ЦIуссалакрал райондалий хьунни Буттал кIанттул цIанийсса Хъунмасса дяъвилул шиннардий Ленинград буручлай бивкIсса шагьрулул агьалинал чувшиврун хас дурсса, «Блокадалул ччатI» тIисса патриот акция. Ва хIадур дурну дия райондалул культуралул идарарттал зузалтрал.

1941-ку шинал сентябрь зурул 8-нния 1944-ку шинал январь зурул 27-ннийн бияннин 872 гьантлий лахъи ларгсса Ленинград шагьрулул блокада хьуссар Буттал кIанттул цIанийсса Хъунмасса дяъвилул яла оьхIалмур ва яла къучагъмур ишну. Яла захIматми зурдардий къуллугъчитуран ва оьрчIан гьантлун дуллай бивкIссар 125 гр ччатIул. Му хьунни акциялул лишаннугу. Культуралул зузалтрал дунни архиврал материаллащалсса, картардащалсса ва блокадалувусса Ленинградрал суратирттащалсса тематикалул выставка, бувккунни шагьрулул халкь цукунсса шартIирдай бивкIссарив, предприятияртту цукун зий диркIссарив бусласисса лекциярду.

Мероприятиялул гьурттучитурахьхьун буллунни 125 гр. дусса блокадалул лишанну хьусса ччатIул касакру, ливтIуминнал аьпалун баян бунни минутрайсса пахъ багьаву, бувккунни фронтраясса чагъардавасса ва блокадалуву бивкIминнал дневникирттавасса парчри. Дуклаки оьрчIал бувккунни блокадалухасса шеърирду, кIанттул Культуралул къатлул артистътурал увкунни аьралий балайрду. Сакиншинначитурал кIицI лавгунни укунсса акциярдайну инсантуран асар хьуну ччай бушиву цуксса кIану бувгьуссарив ккаккан дурсса 125 гр. ччатIул ккашил инжит бувсса инсантурал оьрмулуву.

Андриана Аьбдуллаева