Декабрьданул 24-нний, цIу дагьну, Инишиял къутандалий (Львовский 15) ялув магъи дакъа ливчIунни мукьва кулпат. Лакрал райондалул бакIчи Зураб Куччаев, ДР-лул Халкьуннал Мажлисрал депутат Марат Илиясов, «Гъази-Гъумучи» фондрал хъунама Тамирлан ХIабибуллаев ва Хъунайннал шяраваллил бакIчи ХIажи ХIажиев бивунни апатI хьусса кIанттайн, хьунабавкьунни зарал хьусса кулпатирттащал.

УжагърацIа хьуну ливчIсса кулпатру цавай чIумуйну ликкан бунни кIанттул школалул бачIвасса къатраву, вайми – инсантал ялапар къахъанахъисса къатраву.
Зураб Куччаевлул тапшур ­бунни, кумаг баншиврул, хьусса заралданул багьа бищун ччясса мутталий.
«Гъази-Гъумучи» фондрал ва «Инсан» ихIсандалул фондрал баян бувну бия зарал бивми дакъа чара бакъамунил дузал баншиврул агьалиная арцу датIин.
Тамирлан ХIабибуллаевлул бусаврийн бувну, лакрал агьали чялишну хIала бувххун бур ва чирилул ххуллийсса давривух. Цаппарасса гьантрал дянив дартIун дур ца миллион ва ттуршлий зувиазарда къуруш арцул. Му бакъасса, кумаг бувну бур строительный материал, ичIаллил техника, сантехника, тахIни-кIичIу ласун. Багьлух усттартал къабугьан, субботник баян бувну, къачансса давуртту инсантуралгу дурну дур.
Тамирлан ХIабибуллаевлул барчаллагь увкунни арцуйну, иширайну чIарав бавцIуминнахь.
Барчаллагь увкунни Зураб Куччаевлулгу:
– ХIурмат бусса райондалул агьали, ххирасса ватанлувтал!
Райондалул администрациялул ва ттула цIания дакIнийхтуну барчаллагь тIий ура, чулий къабавцIуну, кьини дурксса кулпатирттан кумаграл ка тIитIаврихлу. ЦIу дагьаврийну хьусса апатI сававну инсантал ялув магъи дакъа ливчIунни, бусса оьрмулий цачIун дурмуницIа хьуну ливчIунни. Ва ишираву зу ккаккан дурунни зула яла ххуйми хасиятру – кумаг бан цачIун хьуну. Зу дуллусса къуруш, му анжагъ кумаг бакъар, му жула ватанлувтурал къатта-къуш цIу буккан баврил ххуллий бивзсса агьамсса шар. Хаснува барчаллагь тIий ура ишбажаранчитурахь, жяматийсса ккураннахь, Марат Илиясовлухь, Хъунайннал шяраваллил бакIчи ХIажи ХIажиевлухь, арцу датIаву сакингу дурну, чIаравгу бавцIусса.
ДакIнийхтуну барчаллагь тIий ура кумаграл ка тIиртIусса гьарцумацаннахь. ДартIсса арцу зарал бивминнан чара бакъа аьркинмур ласун ишла даврил ххуллий кьянкьану ялув бацIантIиссар, – увкунни Зураб Куччаевлул.
Зулайхат Тахакьаева