Ххуллункьини Москавлив Аьрасатнал халкьуннал артист, Аьрасатналгу, Дагъусттанналгу ПаччахIлугърал ва ХIукуматрал премиярттал лауреат, жула заманнул хъунасса композитор Ширвани Чаллаевлун дуллунни паччахIлугърал ларайсса награда «Орден Почета Республики Дагестан».
Награда композиторнан дулун бувкIун бия Дагъусттан Республикалул ХIукуматрал хъунаманал хъиривчу Муслим Телякавов, культуралул министр Зарема Буттаева ва Аьрасатнал президентначIасса Дагъусттан Республикалул муданасса вакил ХIажимурад Къажлаев.
Ларайсса награда композиторнан дуллунни республикалул бакIчи Сергей Меликовлул Указрайн бувну, Дагъусттаннал маданият ва магьирлугъ хьхьичIуннай даврил ххуллий чIярусса шиннардий бувсса творчествалул захIматрахлу.
Наградалущал делегациялул Ширвани Чаллаевлухьхьун дуллунни шяравучутурал чулухассагу, ватанлувтурал чулухассагу хъамакъабитулунсса бахшишру.
ДакIнин бутанну, декабрьданул 15-нний Оьруснал театрданул Хъунмур залдануву, чIявусса илгу бавтIун, лайкьсса даражалий хьуссар композиторнал творчествалун хас дурсса хъуннасса концерт.
ЧIа тIий буру маэстран цIакьсса цIуллушиву!
Зулайхат Тахакьаева
