ЦIуссалакрал райондалийсса школардай кIулшиву дулаврил даву лавайсса даражалийсса душиву тасттикь буллай бур шикку хьхьичIунсса хIасиллай дуклакисса оьрчIал. Вай гьантрай М. Мусаевлул цIанийсса Аьхъардал школалул 9-мур классрал дуклакидуш ПатIимат Ибрагьимовал, «Шаг в будущее» тIисса республикалул чIава ахттарчитурал XXXI элмийсса конференциялий гьуртту хьуну, хьхьичIунсса кIану бувгьунни.

Конференциялул мурад хъанай бур дуклаки оьрчIру элмийсса ахттаршиннарду давривух хIала буххан баву, творчествалул гьунарду аьч баву, итххявхсса оьрчIру республикалийсса цIанихсса аьлимтуращал кIул баву ва миннащал хIала-гьурттуну зузи баву.
ПатIимат Ибрагьимовал цалчинсса кIану бувгьунни «Прикладное искусство и дизайн» тIисса номинациялий. Ва хIадур буллай, ванищал зий бивкIссар Аьхъардал школалул учитель Парисултан ХIусайнова.
ПатIимат, цалчинмур классрава тIайла хьуну, марцIсса ххювардай дуклай бур. Ванил яла ххуймур хасиятгу дур дарсру куртIну лахьхьинсса хIарачат баву.
ХьхьичIунну дарсру лахьхьаврицIун, ПатIимат чялишну гьурттушинна дуллай бур школалий ва райондалий дуллалисса цинярдагу мероприятиярттай. Райондалул ва республикалул даражалийсса конкурсирттай, олимпиадарттай ванил цимилгу хьхьичIунсса кIанттурду бувгьуну бур.
Ттигъанну ПатIимат гьуртту хьунни Москавлив хьусса «Изменение глазами детей – 2025» тIисса цIанилусса щалагу Аьрасатнал экологиялул форум-конкурсрай. Шиккугу ванил цалчинсса кIану бувгьунни.
ПатIимат барча буллай, чIа учинну гихунмайгу хъунисса тIайлабацIуртту.

Имара Саидова