Июньдалул 18-нний Петербургуллал дунияллул халкьуннал экономикалул форумрай Дагъусттаннал БакIчи Рамазан АьбдуллатIипов хьунаавкьунни Санкт-Петербургуллал губернатор Георгий Полтавченкощал.

«2014 шинал жу къулбасру дур­ссия машлул ва экономикалул, элмулул ва техникалул, культуралул хIакъиравусса кьутIилул протоколданий. Тикку жу цIакь дурну диркIссар 2014-2018 шиннардий уртакьну зузаврил план. Амма жущава бюхълай бур, дугу дуллан аьркинссар, лядуккан дуван уртакьну зузаву», — увкунни губернаторнал.
Георгий Полтавченкол бувсунни аьркинну душиву импортозамещениялул ва локализациялул центрданий дуван Да­гъусттаннал нюжмар, мукунма Петербурглив буван ДР-лул оптово-продовольствиялул логистикалул центр. «Жул мурад бур зул респуб­ликалул шяраваллил хозяйствалул бакIлахъия гьарзану дучIан дуллалаву», — увкунни ганал. Губернаторнал мукунма бувсунни кIивагу чул хIала гьурттуну хьхьирил жамирду бавриха (судостроение) зун аьркиншиву.
Рамазан АьбдуллатIиповлул бувсунни Петербургуллащал­сса арардал агьамшиврия. Ганал увкусса куццуй, хIакьину Да­гъусттан мюхтажну бур Петербургуллал предприятиярттал технологиярттахгу, инженертурал ва аьлимтурал цIушиннардахгу. «Жу аьркинссар чялишну ишла буллан зул шагьрулул потенциал», — увкунни республикалул хъунаманал. Ганал мукунма бувсунни Петербургуллал школалий дуклаки оьрчIру Каспий хьхьирий бигьалаглан аьркиншиву.
ХIадур бувссар
ХI. Аьдиловлул