Июньдалул 21-нний Дусшиврул къатраву ДР-лул БакIчи Рамазан АьбдуллатIипов хьунаавкьунни ДР-лул БакIчиначIасса Хъунисриннал советрал члентуращал ва муниципал районнал ва шагьрурдал округирттал Хъунисриннал советирттал председательтуращал.
Рамазан АьбдуллатIиповлул бувсунни Хъунисриннал совет хъанай бушиву ца яла сий думур консультатив орган: «Ганивун бувххун бур бусравсса, чялишну къуццу тIутIисса инсантал, миннал бакIчинугу ур хъинну за кIулсса инсан Аьбдулла МахIаммадов.
Зун цинявннан дакIнийссар цуксса захIматсса тагьар диркIссарив республикалий Совет Союз пасат хьуну махъ. Та чIумал жулва канища ларгссар дуккаву, культура, республикалий дин цIудуккаву. Жура кьариртссар промышленностьраха зузаву, техникийсса дуккаву.
ЦIанасса ппурттуву жунма аьркинссар та чIумал жура къулагъас къадурну ливчIсса масъаларттаха зун, республикалул каялувчинахь буслан проблемартту бусса масъаларттая, ми щаллу буллансса ххуллурдая. », — увкунни Рамазан АьбдуллатIиповлул.
Республикалул каялувчинал бувсунни республикалий хьусса хъинчулийсса дахханашивурттаяту. Ганал мукъурттийн бувну, промышленностьрал производствалул лагру лахъ хьуну дур 1,6-ийла. Шяраваллил хозяйствалул бакIлахъиялул лагру гьарза хьуну дур 1,2-ийла. Гьарза хьуну дур мукунна инвестициярдал лагру ва харжру.
Хъунисриннал советрал председатель Аьбдулла МахIаммадовлул мукъурттийн бувну, Хъунисриннал советру сакин бувну бур республикалул циняв шагьрурдай ва районнай.
ХIакьинусса кьини миннуву зий бур азарунная ливчусса инсантал. Аьмну Дагъусттаннай, шяраваллавумигу хIисавравун лавсун, республикалул Хъунисриннал советрал системалуву зий бур 3 азаруннаяр ххишаласса инсантал.
Хьунабакьаврий ихтилатру бунни муниципал сакиншиннардал Хъунисриннал советрал члентуралгу.
Масъалартту ххал бигьаврил хIасиллу дунни Республикалул хъунама Рамазан АьбдуллатIиповлул.
ХIадур бувссар
ХI. Аьдиловлул
