Вай гьантрай Ккурккуллал шяраву хьунни хасъсса аьралий операциялул гьурттучи Тимур КьурбанмахIаммадовлул лайкь дурсса Жуковлул медаль ванал гъан-маччанахьхьун дуллалисса батIаву.
Награда дуллунни Тимурдул арснахьхьун, Аьбдулаьзизлухьхьун, ва уссурваврахьхьун, Кьурбанаьлихьхьун ва Тиграннухьхьун. Ва дулун Ккурклив бувкIун бия Лакрал райондалул бакIчи Юсуп МахIаммадов, Лакрал ва Ккуллал районнал аьралий комиссар Аьли ГъазимахIаммадов, гъанчу Сайпуллагь Аьбдуразакьов. Шикку гьуртту хьунни Тимурдул гъан-маччами ва шяраваллил жямат.
Хасъсса аьралий операция нанисса кIанттурдая, цIуллу-сагъшиврул тагьар къулай хьуннин, отпускалий итаавкьусса Тимур махъунай ачин хIадур хъанай уссия. Оьрмулул 49 шинаву бяливчIунни ванал оьрму.
Тимур увну ур 1974-ку шинал августрал 18-нний КIамахъаллал шяравасса МахIаммадлул ва Ккурккуллал шяравасса Сибрижатлул кулпатраву. 1991-ку шинал къуртал бувну бур Ккурккуллал дянивмур даражалул школа. 1995-ку шинал аьралий бурж лахъан лавгун, къуллугъ буллай ивкIун ур Забайкаллал аьралий округрай. Школалий дуклакисса чIумала Тимур икIайва сивсусса, кьянкьа-кьурчIисса, чумартсса оьрчI. Адаминайнусса тIуллу дусса унутIий ххирасса ия цинявннан. 2022-ку шинал хушрай лавгуна хасъсса аьралий операция нанисса кIанттурдайн Ватандалул мурадру буруччин. Къуллугъ буллай уссия Запорожскаллал областьрай стрелокну. Запорожскаллал областьрал Пологовский райондалийсса Работино шяравалличIасса талатавурттаву щавурду дирну, хъин хьуннин шавай итаавкьуну ия…Та чIумал увкIуна шяравунгу, Ххувшаврил байрандалий гьуртту хьун. Хъин шайхту махъунай зана хьусса Тимур Херсоннал областьрайн штурмовикну тIайла увккун ия.
Тимур аьпалухьхьун лавгунни 2023-ку шинал декабрьданул 17-нний отпускалий шавай увкIсса чIумал. Ва увччуну уссар Ккурккуллал шяраву.
«Дуснакьраву щяивкIун къахъинав та цIаравун лагаяр, сагънувагу личIанхьува», – куну, хъярч бувсса ссихь, Тимурдул увкуну бия: «Ина ттул арснайн дезертирнал арс тIутIи бан ччай бурав», – куну. Укунсса ия жул Тимур. Чувшиврулгу, чумартшиврулгу бутIа буллусса. Ванал махъ ливчIунни ца арс.
Цинявппагу уссурссу куна, Тимургу ия дакI-аьмал хъинсса, дугърисса, цаманан кумаг бан, чIарав ацIан анавар уккайсса жагьил.
Тимурдул дуссия Дагъусттаннал Миллатрал политикалул ва диннал иширттал министерствалул чулухасса ХIурматрал грамота.
ХIайп, цIанасса награда цала канил дугьан кьисмат къавхьунни.
Шиккува кIицI лаган, Тимурдул ниттил ппу Султанбаг МахIаммадовгу Буттал кIанттул цIанийсса Хъунмасса дяъвилий гьуртту хьуссар. Щавурду дирну ивкIссар. Госпитальдания увккун махъ цIунилгу дяъвилийн лавгун, ятIа-тIар бакъа акъа хьуссар
Андриана Аьбдуллаева
