Лакрал театрдануву лайкьсса даражалий хьунни Дагъусттаннал бусравсса артистка Зинаида Чавтараевал бенефис.
«ЧIивиний на нигьабуслай бикIайссияв сахIналийн буккан. Театр шяравун бувкIний тIурча, микIгулавчIун, буруглан бикIайссияв артистътурал тIуркIулухгу, тамашачитурал асардахгу. КъюкIмур гьалак дуклан дикIайва. ДакIнил куртIниву бия хиял. Гьарцагу вас-ццах – нузкьунни, тIитIа му – ххал хьунтIиссара вин хIакьсса инава. Цалчин сахIналийн бувксса лахIзалуву ттун бувчIуна – театр ттула ужагъ бушиву. Вана укун, начилсса душния хьуна чани пишкаш бан бюхъайсса хъамитайпа, му чани цуппагу ганил магьирлугърал чанир. Ца ччивахха ттун таний, вай цIана нава учинтIисса махъру ттунма бавну:
«КIулну бикIу вила дакIнил кьуват, вища вила дакIнин ччимур бан бюхъантIиссар, щала дунияллул вил хьхьичI цила нузру тIитIинтIиссар. Ина так тачIав ссаячIав ва щиячIав нигьамабусара. Вийнма инава вихну хияллал хъирив бачу», – укун байбивхьуна жагьилсса актрисал авадансса ва яргсса творчествалун хас бувсса мажлис.
Бенефисрал программа хIадургу дурну, дачин дурну ия гьунар бусса актер ва режиссер Руслан Ларин.
Зинаида Чавтараева барча бан сахIналийн бувккуна Дагъусттаннал паччахIлугърал филармониялул каялувчи Ирина Нахтигаль, цилгу Г. ХIасановлул цIанийсса МахIачкъалаллал музыкалул училищалуву ванихь дарс дирхьусса.
«ТIабиаьтрал буллусса гьунардануцIун, Зинаида бия захIмат ххирасса студентка. НасихIатчитурал ванийнсса умудругу чIявуя. Амма ва цакуну бакъа-къатIа хьуна. ЧIун чIарах дукканнин жун ванил цIа баллай дайдирхьуна, цаннияр ца тIайлабацIусса ва яргсса рольлайну. На ххарину бура Зинаидаща цинмасса ххуллу лякъин бюхъаврия, пахрулий бура ванил тIайлабацIурттая, хьхьичIуннайшивурттая», – увкунни Нахтигальлул.
Зинаидахь школалий дарс дирхьусса «Илчи» кказитрал журналист Залму АьбдурахIмановал кIицI лавгуна ва чIивинияцIава творчествалухух лавгсса душ бивкIшиву. Школалул мероприятиярттай пасихIну назму дуккингу, бюхханну балай учингу ванийнсса вихшала хъуннасса диркIшиву.
ГьунчIукьатIрал шяраваллил жяматрал цIания Зинаидагу барча бувну, ванил кьини хъун дан бувкIминнахь барчаллагь увкуна Зиябуттин ХIажимирзаевлул, Сиражуттин Чавтараевлул, Морис Дандамаевлул. Вайннал кIицI лавгуна Зинаидал ппу Зайнулаьбид балай учаврил гьунар бусса ивкIшиву ва республикалул художествалул самодеятельностьрал смотрдай райондалул чулуха гьуртту шайсса ивкIшиву. Душнийнгу, махъ бакъа, буттал гьунар ирсирай бивну бушиву
М. Илиясовал цIанийсса «Дараччи» фондрал хъунмур Гульшан Хасаевал барчаллагь увкунни щихачIав къалавхьхьусса, яргсса актрисахь, жагьилсса оьрмулух къабурувгун, Лакралгу, щала республикалулгу театрал магьирлугъ хьхьичIуннай дуллалисса хIарачатрахлу ва захIматрахлу.
Ихтилатру буллалими чIа тIий бия актрисан ттигу чIярусса шиннардий цила творчество ххирами яргсса рольлайну, хьхьичIуннайшивурттайну ххари буллансса цIуллушиву ва тIайлабацIу.
Лакрал театрдануву тIайлабацIу хъунмасса кIива проект дузрайн дуккан дурсса У. Шекспирдул «Тарс мютIи баву» ва Ч. Айтматовлул «Ниттил хъу» спектакльлу бивхьусса режиссер (кIивагу спектакльдануву Зинаида Чавтараевал агьамми рольлу дургьуссар ва ми рольлахлу сий лахъсса фестивальлай ларайсса бахшишран – «За лучшую женскую роль» дипломран лайкь хьуссар, Ухссавнил АьсатIиннал ва Къабардин-Балкьарнал халкьуннал артист Гиви Валиевлул видеолий чирчусса барча бавриву кIицI лавгунни Зинаида Чавтараева, махъ бакъа, бюхттулсса даражалул актриса бушиву.
«Цумарив ца хъунасса режиссернал увкуну бур: «Спектакль хIадур буллалийни режиссер актернах эшкьи хьуну икIан аьркинссар», – куну. «Укрощение строптивой» ва «Ниттил хъу» спектакльлу хIадур буллалиссаксса хIаллай нагу уссияв, Зинаидай, вих эшкьи хьуну. Вил захIмат ххирашиврух, ина дакIнийхтуну рольданухух лавгун бушиврух. Вила захIмат чулийн буккан бан ина вищава бювхъумунияр ххишалагу бувара. Бигьин къакIулну бухьурчагума, ина зуманийн бияннин бивгьуну лавгун, ххув хьуну буккара. На вин дакIнийхтуну чIа тIий ура вила гьунарданийну, му вин Занная бивну бур, тамашачитурал дакIру хъин дуллансса цIуллушиву. Тамашачитуран ина дакIнийхтуну ххирара. ЧIа тIий ура вин бахтти, талихI, тIайлабацIу», – увкунни Гиви Валиевлул.
Вара журалийсса видеобарчабаву тIайла дурккун дия «Укрощение строптивой» ва «Ревизор» спектакльлаву Зинаидащал агьамми рольлу дургьуну ивкIсса Аьрасатнал лайкь хьусса артист МахIаммад Сурхатиловлулгу.
Экрандалийгу, сахIналийгу ккаккан бунни актрисал агьамми рольлу дургьусса спектакльлавасса бутIри.
Бигьасса иш бакъар ца мероприятиялул лагрулий сипатрая сипатрайн бучIан. Амма Зинаидаща бювхъунни ми цинярда цаннияр ца яргссагу, жапассагу сипатру усттарну ккаккан дуван.
Ч. Айтматовлул «Ниттил хъу» спектакльданувасса бутIа ккаккан бувну махъ, театрданул директор МахIаммад ХIусайновлул Алиманнул роль дургьусса Зинаида Чавтараеван ва ниттил роль дургьусса Дагъусттаннал халкьуннал артистка Луиза Шагьдилован буллунни ттигъанну Нальчик шагьрулий хьусса «Южная сцена» тIисса дунияллул халкьуннал театрал фестивальданий хIалал бувсса «За лучшую женскую роль» дипломру. КIиннинмагу Дагъусттан Республикалул культуралул министр Зарема Буттаевал чулухасса тIутIал кацIругу пишкаш бунни.
Лакрал театрданул магьирлугърал ттугъ лавсун нанисса гьунар бусса актрисагу, коллективраву хIал бавкьусса зузалагу барча буллай, даврил уртакьтал кIицI лаглай бия Зинаида хъинну жаваблувсса, циярасса тIалавшинна хъуннасса ва низам цIакьсса бушиву.
Бенефисрал программа къуртал дурунни Зинаида Чавтараевал цила ниттин хас бувсса романс щаллу баврийну.
Ахирданий актрисал барчаллагь увкунни цила хиял бартлагаврин бахчу къабувсса нитти-буттахь, цивувасса гьунар аьч бангу, усттаршиву магьир дангу кабакьу бувсса режиссертурахь, цила творчествалухсса хIурматрайну дакIниву гьавас ххи буллалисса тамашачитурахь.
Зинаида Чавтараевал яргсса гьунарданул на даингу хIайран байвав. Бенефисрал дайдихьулий ва дайлитIулий бувсса ванил ихтилатрайну, программа наниссаксса хIаллай экрандалий ккаккан бувсса интервьюрдавасса бутIрайну ххишалану аьч хьунни актрисал дакIнил дуниялгу авадансса душиву. Мунияту хъиннува ххирагу хьунни. ТалихIрайн букканнав ина, Зинаидай, яламур цимур-ца вичIа укуннагу дур – гьунаргу, тIайлабацIугу, хьхьичIуннайшивурттугу, тамашачитурал ччавугу, хIурматгу.
Зулайхат Тахакьаева
