МахIачкъалалив Р.ХIамзатовлул цIанийсса миллатрал библиотекалуву хьунни фронтовик, аьлимчу, журналист МахIаммад Буттаевлун 100 шин шаврин хас дурсса мероприятие. Шикку гьуртту хьунни политикалул ва жяматийсса ишккаккулт, аьлимтал, МахIаммад Жалалуттиновичлул оьрчIру, оьрчIал оьрчIру, гъан-маччами, дустал, даврил уртакьтал, ванал дарс дирхьусса студентътал, Ккурккуллал жяматрал вакилтал. Бачин бувну ия мажлис Дагъусттаннал Чичултрал союзрал хъунаманал хъиривчу Супиян Оьмаров.

МахIаммад Жалалуттинович жяматрачIа бусраврай ва хIурматрай ивкIшиву чIалай бия щапI куну бувцIусса залданийнугу, чIирисса чIумул дянив хIадур дурсса мероприятие лавайсса даражалий лагаврийнугу. Мероприятиялул сиптачи ва сакиншинначи хьунни М.Илиясовал цIанийсса «Дараччи» ихIсандалул фондрал президент Гульшан Хасаева.
МахIаммад Буттаев ия цува авцIусса кIану чIюлу буллалисса инсан. Ва зий ия личIи-личIисса жаваблувсса хIукуматрал къуллугъирттай, чув ухьурчагу бусравну ва ххирану ия.
Мажлис тIитIлай, цинявппа барчагу бувну, МахIаммад Буттаев щалагу Дагъусттаннал пахру бан лайкьсса инсан ивкIшиву кIицI лавгунни цила ихтилатраву библиотекалул хъунаманал хъиривмур Сарат Аьбдуллаевал. Хъирив МахIаммад Буттаевлул яргсса оьрмулул ва захIматрал ххуллия, Буттал кIанттул цIанийсса Хъунмасса дяъвилийсса гьурттушиннарая бусласисса ихтилат бунни жяматийсса ишккакку Шалласу Шалласуевлул. МахIаммад Жалалуттинович дакIнин утлай, ванал творчествалун лавайсса кьимат бишлашисса, гьарица чулухасса ванал гьунар, узданшиву, тIайлашиву, инсаншиву кIицI лаглагисса ихтилатру бунни Аьрасатнал халкьуннал ассамблеялул Дагъусттаннал региондалул отделениялул председатель Зикрула Илиясовлул, чичу, публицист, таржумачи Марина АхIмадова-Колюбакинал, чIярусса шиннардий Дагъусттаннал Журналистътурал союзрал председательну ва «ХIакъикъат» кказитрал редакторну ивкIсса Аьли Камаловлул, М.Илиясовал цIанийсса «Дараччи» ихIсандалул фондрал президент Гульшан Хасаевал, «Зунттал хъами» журналданул хъунмур редактор Хамис Шамиловал, вава журналданул жаваблувсса секретарь, лакку мазраймур журналданул редактор Аьжа АьбдурахIмановал (Хаппалаевал), Дагъусттаннал халкьуннал шаэр Мирза Давыдовлул, филологиялул элмурдал кандидат, чичу Аьбдуссалан Магьдиевлул, шяравучу Сайпуллагь Аьбдуразакьовлул, коллега ва кулпатрал дус Майсарат Мусаевал, «Дагестан» журналданул хъунама редактор Марат ХIажиевлул, «Илчи» кказитрал отделданул редактор Андриана Аьбдуллаевал.

Ккурккуллал кьини барча дуллай, цала ссурахъил, Анзордул, гьан бувсса чагъар бувккунни Сулайман Аьбдуразакьовлул.
Хамис Шамиловал бувсунни цуппа МахIаммад Жалалуттиновичлул студентка бушиву, кIицI лавгунни «Ккурккуллал хъярчру» зунттал халкьуннал хIакьсса юморданул энциклопедия хъанахъишиву, МахIаммад Буттаев зунттал халкьуннал яхI-къириятгу, хъярч-махсарттугу ябувсса инсан ивкIшиву. Гульшан Хасаевал кIицI лавгунни МахIаммад багьу-бизулуву, тIул-тIабиаьтраву, учайсса мукъуву, инсантуращалсса арардаву аристократ ивкIшиву.
Аьжа АьбдурахIмановал бувсунни МахIаммад цила хъатIуй тямадану ивкIшиву, ванал кьамул бувшиву цуппа СССР-данул Чичултрал союзравун. Бувсунни МахIаммад ва цила ппу дустал, хIаласулт бакъассагу, ца уссурвал кунма, гъансса инсантал бивкIшиву. Марат ХIажиевлул дакIнин бувтунни цала цалчинсса очерк МахIаммад Буттаевлуя бивкIшиву, ва цала цалчинсса наставникгу хьушиву. КIицI лавгунни МахIаммад Жалалуттинович итабакьлай ивкIсса журналданул редакторну зун кьисмат шаврия цува рязину ушиву. Ванал лавайсса кьимат бивщунни МахIаммад Буттаевлул «Репрессии 30-х годов» тIисса луттиран.
Цал бунугу, Буттаевхъал ичIува хьуми, кIицI лаглай бия ванал кулпатрал, ПатIиматлул, аьчухшиву, хъамал ххирашиву.
МахIаммад Жалалуттинович дакIнин утан ччисса, мунащалсса хIала-гьурттушиврия, дусшиврул арардая бусан ччисса ялагу чIявусса бия. Шанна-мукьра ссятрай лахъи ларгсса мероприятиялий авкIусса, бизар хьусса акъая. Цинявппагу МахIаммад Буттаевлул оьрмулувасса лахIзарду бия яргсса, гьармуних вичIи дирхьуну бия гъирарай. Дагъусттаннал халкьуннал артист Шамсуттин Къапланов, лях-карах «Ккурккуллал хъярчру» луттиравасса парчри ккалай, хъиннува тяхъа-таза буккан буккан буллай ия мажлисрал гьурттучитал.
Мажлис чIюлу бунни Дагъусттаннал халкьуннал артистка Саният Рамазановал ва Загьидат Муслимовал балайрдал. Гьай-гьай, Тарият Къапиевал къищусса къавтIаврилгу.
Шиккува дакIнин бутан, цувагу оьрмулул шиннавугума ца куклуну, исвагьину къавтIун изайсса МахIамад Буттаевлун ххирассия Тариятлущал къавтIун изан, цумур-цагу мажлисрай ва буккан байссия.

Ихтилатру къуртал хьуну махъ МахIаммад Буттаевлул душнил, Галинал, щалагу кулпатрал цIания дакIнийхтунусса барчаллагь увкунни мероприятиялул сиптачитурахь ва сакиншинначитурахь, шикку гьуртту хьун бувкIминнахь, цинявппагу цала ппу дакIнийминнахь.
– ХIакьинусса мажлис, ттул буттан бакъассагу, щалагу жуятура ларгсса никиран хас бувсса мажлисри. Буттал бавтIунну жува куннан кув ккаккан, цачIу щябикIан, хъярч-махсара бан, жула мархри дакIнин бутан, – увкунни Галинал.
Мероприятиялул лагрулий гьаз бунни МахIаммад Буттаевлул цIа абад даврил, школалун, библиотекалун, кIичIираваллин ванал цIа дизаврил , му ялапар хъанай ивкIсса къатрал чIирай аьпалул ула лачIаврил масъала.
МахIаммад Буттаевлул бувтун бур яргсса оьрму. Буттал кIанттул цIанийсса Хъунмасса дяъви байбивхьусса чIумал ванан дахьра 17 шин диркIун дур. Му чIумал ва дуклай ивкIун ур Буйнакскаллал машлул техникумраву. Билаятрайн душман ххявхсса баяйхту, ванал нигь диркIун дур оьрмулул шиннайн бувну цува дяъвилийн къауцинссара тIисса.
– Дяъви байбивхьусса чIумал ссал пикрирдай уссияв учирча, жагьилшиврул ттул бакIравун бухлай бакъая жула ялун хъунмасса бала бившиву. КъабувчIлай бия циван аьтIутIиссарив нину. Вагь, ванин цила арс Виричу хьуну къаччиссарив? Ча дурчIинссия ттун ца акъа акъасса арс дяъвилийн тIайла уклакисса ниттил къювугу, дардгу, – чичлай ур МахIаммад цала дакIнин бичавурттаву.
Арс хушрай дяъвилийн нанисса кIул шайхту, ванал лахханмунил пикрирдай бивкIун бур нину-ппу. «Дух хьусса ци-дунугу лаххи, ци чулийгу, ми тийх даххана дантIиссар», – тIий ивкIун ур ппу.
«Яла ххуйми янна лаххи, ттул арс, душманнал хьхьичIун духсса янналуву къалагайссарча», -– тIий диркIун дур нину.
Хъирив кьини МахIаммадлул ниттил Мисидул вичIахсса мусил вичIилусругу, канийсса кIиссагу ливккун, шяраваллил советрал председательнахьхьун буллуну бур , ттул арснахьхьун булунсса ярагъ бувача заводрай куну. Мунияр тинмай лахъисса дяъвилул ххуллу бивтун бур МахIаммадлул.
– Дяъвилул майданнив инсаннан бивкIулия нигь къадикIайсса кьянкьашиврул бакъарча, муния пикри бансса чIун дакъа тIийри, – учайва МахIаммадлул. Ххувшаву ларсъсса, Рейхстаграй ттугъ бивщусса хавар ванан бавну бур госпитальданий. Ххаришиврущал архIал, ай, цанна нава цIана Берлиннай акъасса тIисса сси-къащигу диркIун дур. 1945-ку шинал зана хьуну ур МахIаммад аьрая. Арс увкIсса ххарисса хавар бувсъсса чIаххувдушнин Мисидул бярч буллуну бур. Дяъвилул цIараву ккаккан дурсса къучагъшиврухлу МахIаммад лайкь хьуну ур личIи-личIисса наградарттан. Вайннувух дур Буттал кIанттул цIанийсса дяъвилул 1-мур ва 2-мур даражалул орденну. Дяъвилия зана хьуну махъ МахIаммад Жалалуттинович зий ивкIссар хIукуматрал жаваблувсса къуллугъирттай. Москавлив Лавайсса даражалул партиялул школалул журналистикалул факультетгу лавайсса кьиматирттай къуртал бувну, зий ивкIссар партиялул обкомрай личIи-личIисса къуллугъирттай. 1965-ку шинал ва ивтссар «Советский Дагестан» журналданул хъунама редакторну, архIала Дагъусттаннал Журналистътурал союзрайгу каялувшиву дуллай.
1980-ку шинал М.Ломоносовлул цIанийсса Москавуллал университетраву элмурдал доктор хьунсса диссертация лайкьну дурурччуссар. МахIаммад Жалалуттинович уссия Дагъусттаннал университетрал журналистикалул отделениялий кафедралул хъунаману. Ттунгу бахтти хьуссар ми шиннардий ванал лекциярдах вичIи дишин. Ва студентътуран ххирасса преподавательтуравасса ца ия. Ванал лекциярдах гъирарай вичIи дирхьуну бикIайва.
МахIаммад Буттаевлул итабавкьуссар цикссагу луттирду, монографияртту, элмийсса макьалартту. «Фронтраясса шанмурцIурду» тIисса ванал луттиран багьа бищун къашайссар. «Ккурккуллал хъярчру» тIурча, чил билаятирттал мазурдийнгума таржума бувну буссар. Ватандалулгу, жяматралгу цIаний бивхьусса захIматрахлу МахIаммад лайкь хьуну ур Халкьуннал Дусшиврул ордендалун, Дагъусттаннал паччахIлугърал премиялун ва чIярусса цаймигу наградарттан. МахIаммад Буттаев ия гьарица чулуха гьунар бусса инсан. Ия мукъул усттарсса, тIуллу уздансса. Бюхханну махъгу лахъайва, тIааьнну, пасихIну ихтилатгу байва. Угьара хьуну махъгу жагьилминнаяр куклуну, исвагьину къавтIунгу изайва. «Мусил МахIамма» учайва ванайн гъан-маччанал. Нур дирзсса инсан ия.
Даниял Магьдиевлул сипталий бувсса Ккурккуллал Аьралий музейраву личIину буссар бусравсса, пахру бан лайкьсса шяравучунан хас бувсса кIану. Ккурккуллал жяматран ва мудангу дакIний икIантIиссар.
Андриана Аьбдуллаева