Жижара бувцириннайн барчаллагьрай
Ноябрьданул 2-нний дунияллия лавгунни Цалчинмур ЦIувкIратусса Исмяил ва ПатIимат Халиловхъал чIавама арс Аьбдулманап. Жу жулва кулпатрал ца яла яргма личностьрацIа хьунну. Дяинтту увсса ванал дия ва чIумул хасиятру: аьчухшиву, тяхъашиву, оьрмулия ххаришиву , ххуймунийн хъит тIутIаву.
Аьбдулманап уссия дакI-аьмал хъинсса, дуккавриву ва дунияллухсса ябитавриву итххявхсса, чIявусса луттирду бувккусса, интеллигент. Ванал пишлил лагма-ялттуминнал дакIру дассан дайва, шад байва. Ванан ххирая инсантал, чялиш уккайва инсаннал хIурмат бан. Халкьуннангу ва ххирая. Мяйжаннугу ххирасса ивкIшиву исват хьунни ва махъва-махъмур ххуллийн тIайла уккангу, жижара бангу ссукIурайн
чIявусса агьлу батIаврил. Аьбдулманаплул Халиловхъал кулпатрал оьрму гихунмай лахъи баврил ялувгу ччянива пикри бувссар: ца арснан буттал цIа дирзссар, ваманан – хъунама уссил цIа, душнин –ниттил.
Щалвагу кулпатрал цIанияту на барчаллагь тIий ура жущал кьурчIишиву кIидарчIуминнахь.
ЧIа тIий ура зун цIакьсса цIуллушиву ва гьармуниву тIайлабацIу.
ХIурматращал
АьбдурахIман Халилов
ХIаммадил арс Рамазанов Сяид
Октябрьданул 10-нний, хъинну оьсса кьадарданул цинявгу микIлачIун бувну, уссур-ссугу вав-шав тIи бувну, жуятува личIи хьунни чIун дакъа, мурадрайн къаивнува, ххаллилсса жагьил, дакIгу, аьмаллугу ххуйсса, дустуравугу, кIулцириннавугу бусравсса, ГьунчIукьатIрал шяравасса Сяид ХIаммадил ва Гулизардул арс. Жагьилсса оьрмулуву хъуна адамина куна къуццу буллай, къушлил бакIцIуцIавугу, данмур-дитанмунилссагу буллай, узданну оьрму бутлай уссия. Школагу ххуйну къуртал бувну, гихуннай ларайсса кIулшивугу ларсуна Сяидлул. Узданну кабинетраву зун бюхълай бунугу, захIмат ххирашиврул зий икIайва личIи-личIисса стройкардай. Махъсса кIира-шанна шинай буттащал архIал яттихун агьуна. Дурну дия ххаллилсса къатри. Къатравунгу ивзун, пикри буссия кулпат бувну, щаллу хьунсса. Так ми хияллу ливчIунни хияллунува…
Къанясивну бивкIун бур, ххирай Сяид, вин мурадрайн иян. Ци банссар, банмур къаляхълай, ина ча укканавав, та учIанавав тIий, вав-шав тIийнма бур вил нинугу, ппугу, ссурвалгу ва махъсса цинявгу ина ххирану, вил хIурмат буну бивкIсса мачча-гъанмигу, дусталгу. Вана хъанай бур ина жущал акъа мукьцIалва гьанттагу. Цуксса чIун, цими шин гьарчагу, Сяид, зумув рухI дуссаксса жун ина хъама къаитантIиссара. Шанашу тти, ххирай, абадул шаний!
Цинявгу ина ххирами
***
КIул бакъа бала бувкIун,
Жуя личIи увунна,
Жул бакI ххуй, жул исвагьи,
Цинявннан ххира Сяид.
Вил бивкIулул бюххаврил
Циняв микIлачIун бунни.
Ниттил ца акъа акъуй,
Ссурваврал ххира уссуй.
Ниттин маслихIат байва,
Бувсъсса мукъуй цIу бия.
Буттал ххира арс ияв,
Акъа чара бакъаяв.
Ина дурсса къатригу,
Вих ялугьлай, аьтIий дур,
Сяид, данмур чIярурхха,
Циван къанай ура тIий?
Вил ниттил къювулуща
Аллагьнал буруччиннав,
Вин къабуллусса оьрму
Вил ссурвавран ххи баннав.
Шанашу, ххирай Сяид,
Вила абадул шаний!
ДакъацIайсса ликригу,
Даврих мякьсса каругу,
Цукун дарцIуну дур тти?
Ссавур цукун дувара
Даву дакъа, зукъазий?
КъабучIаннав, яраппий,
Мукунсса кьадар щинчIав,
Къабагьаннав цукунчIав
Ниттихъал лякьлуй бярчIу.
Асият Дандамаева,
ш. ГьунчIукьатIи
***
Сяид, ттул янил чаний
Мурадиран увсса арс,
Циванъя вин нязанний
БучIайсса оьсса кьадар?
Гьарца чулий щаллусса
Ттул ас-ламус бусса арс,
Буси, цукун кьюлтI чиви,
Цукун духIави вил дард?
Цукун кьабитав, ттул арс
Ххира ссурвал аьсивну,
Гьартасса дунияллий
Ваксса укун къуману?
ТачIав хьхьара къахьунссар
Хханххираву щавурду,
Гъюжу дурксса къюкIливу
Ччурччу дакIнил къювурду.
ЛухIи ларгунни,ттул арс,
Щаллара дуниялгу,
Ва аьрщарай яхьунсса
Бакъар утти гъирагу.
Дази къалагай дакIгу
КъадацIай иттав макьгу,
Бура луглай, къаляхълай
Утти вил ца ххютрагу…
КьурбанпатIимат Штанчаева,
ш. Баку
Сайпул душ Бижитуева Роза
Оьрмулул 69 шинаву аьпалухьхьун лавгунни чIярусса шиннардий Хьурттал школалий оьрчIахь дарсру дихьлай бивкIсса учительница, щалагу жяматрал дянив бусравсса Бижитуева Роза Сайпул душ.
Роза бувссар Ккуллал шяраву Сайпул ва Муслиматлул кулпатраву 1956-кусса шинал.
Буттал шяраву ххуйсса кьиматирттай школагу къуртал бувну, бувхссар Дагъусттаннал паччахIлугърал университетрал химиялул факультетрайн. Университетгу ЯтIул дипломрай къуртал бувну, зий бивкIссар Лакрал райондалий КIундиннал, Хъунайннал, Хьурттал школардай. Хьурттал школалий биологиялул ва химиялул дарсру дихьлай ванил сайки 40-нниха лирчусса шинну дурссар. Роза бия куртIсса кIулшиву дусса учительница. Ва цимилгу, райондалул КIулшиву дулаврил управлениялул чулуха хьуннав, Министерствалул чулуха хьуннав грамотарттан, дипломирттан лайкь хьуссар. Ванил лайкь дурссар «Отличник образования РФ», «Почетный работник образования РФ» тIисса цIарду. Ванил дарсру дирхьусса оьрчIру школа къуртал бувну махъгу мудан ванищал дахIаву дуну бикIайва. Ва ахиратрал хьусса кьинигу, хъиривми кьинирдайгу ваних жижара буван бувкIсса инсантурал ахир дакъая. ДакIнийхтуну дард ва кьурчIишиву кIидачIлай, жижара буллай буру, ванил ниттихь, ласнахь – жула учитель Аьбдул-Муталиблухь, арсваврахь, уссурваврахь, ссурваврахь ва махъсса цинявппагу гъан-маччаминнахь.
Имандалий лавгун лякъиннав, алжаннул ххари баннав. Махъсса цинявннал оьрмурдай барачат бишиннав.
Хьурттал школалул коллектив,
Хьурттал ва ХьурукIуннал
жяматру
АьбдулпаттахIлул арс Мирзаев Пазлуттин
Лахъи ларгсса цIуцIаврища ххассал къавхьуну, дунияллия лавгунни БахIикIуллал шяравасса бусравсса зунтталчу, Дагъусттаннал лайкь хьусса экономист, совет милицанал отличник, подполковник, АьбдулпаттахIлул арс Мирзаев Пазлуттин.
Увну ур ва 1940 шинал декабрьданий. Буйнакскалий Финансово-экономический техникум къуртал бувну бур 1959 шинал, Дагъусттаннал паччахIлугърал шяраваллил хозяйствалул институтрал экономический факультет –1971 шинал ва СССР-данул МВД-лул академия – 1981 шинал.
Зий ивкIун ур ДАССР-данул МВД-лул ОБХСС-рал хъунама инспекторну, ЦIуссалакрал райондалул ОВД-лул хъунаману, Хасавюртуллал шагьрулул ОВД-лул хъунаману, Пермскаллал областьрал 201-ВВ-лул управлениялул Оператив отделданул хъунаманал хъиривману.
1990-2003 шиннардий зий ивкIун ур паччахIлугърал хъунама налоговый инспекторну, мукуна вава къуллугърай налогирттал цаймигу отделлай. Цувагу налогирттал къуллугърал цалчинмур ранграл советник-я. 2024 шинал август зуруйнин зий уссия МахIачкъалаллал 15-мур ЖЭУ-лул юристну.
Цува зузисса къуллугъирттай лажин кIялашиву дурсса, даву ххуйну кIулсса, архIал зузиминнал ва лагма-ялттуминнал дянив хIурмат лавайсса инсан уссия.
ДакIнийхтунусса кьурчIишиву кIидачIлай, жижара буллай буру ванал кулпатрахь, арсурваврахь, вайннал наслулухь, цинявгу гъан-маччацириннахь.
Пазлуттин алжаннул ххари аннав, имандалий лавгсса хьуннав, гьаттай нур дизаннав.
БахIикIуллал
ва Читтурдал жяматру
