Къиримнаву, Ялта шагьрулий, СВО-лул Аьрасатнал цалчинма Виричу НурмахIаммад ХIажимахIаммадовлул аьпалун хас дурсса лачIун буккаврил турнир хьунни.
Ваний гьуртту хьунни Аьрасатнал 26 региондалиясса 200-ннаха ливчусса чIава спортсментал.
Бусравсса хъамаллуравух бия дунияллул спортрал чаннацIурттигу: Олимпиадалул чемпион ХIажимурад МахIаммадов, Олимпиадалул тIуркIурдал арцул призёр Алёна Карташова, Дунияллул чемпион Ибрагьим Алдатов. Дагъусттанная – Виричунал нину Сапижат Мазаева, ниттиуссу Малик Мазаев.
Турнирданул сакиншинначиталгу бия лачIун буккаврил Ялталул Федерация «Единая Россия» партиялул кабакьаврийну.
Къиримнал ПаччахIлугърал Советрал председательнал цIанияту бавтIцири барча бунни республикалул парламентрал бакIчинал хъиривмур Алла Пономаренкол ва спортрал министр Ольга Торубаровал. Вайннул кIицI лавгунни, чIяву миллатру бусса Аьрасатнал гуж, цIакь НурмахIаммад кунмасса арсру ва Сапижат Мазаева кунмасса ниттихъул бушивруву бушиву.
Сапижатлулгу барчаллагь увкунни турнирданул сиптачитурахь, сакиншинначитурахь ва гьуртту хьуцириннахь.
– Барчаллагьрай бура лачIун буккаврил Ялталул Федерациялул президент Элэлян Эдгардуйн, вице-президент Иван Яценкойн, вице-президент ва хъунама тренер НурмахIаммад НурмахIаммадовлуйн, гьарцагу спортсменнайн. ЛичIинува барчаллагь учин ччай бура вай гьантрай жулва чIарав бавцIусса ватанлувтурайн, миннавух лакгу бия, Цалчинмур ЦIувкIратусса Кьурбанов Минкаил тIисса хьхьичIун урувгсса жагьил ия. Бия цаймигу жагьилтал. Гъурбатрайгу лакрал цIа-кьини лахъну дуручлачисса чиваркI. Хъинну ххуйсса даражалий турнир тIайла дуккансса хIарачат бувну бия муниха зий бивкIцириннал, тукун хъунисса мероприятияртталгу хъирив нанисса никираву патриот асарду цIакь буллалиссар. Так НурмахIаммадлул аьпа уттава буллалисса даву дакъаяча, Аьрасатнал агьалинал цашиву ккаккан дуллалисса, спортравугу, гьармунивугу цачIу-чIарав бавкьуну къуццу тIий бушиву ккаккан буллалисса даву дия, – увкунни Сапижат Мазаевал.
ПатIимат Рамазанова
