Дагъусттаннал Росгвардиялул управлениялул «Горец» ОМОН-далул зузалт гьуртту хьунни «Сдай кровь – спаси жизнь» тIисса щалагу Аьрасатнаву нанисса чирилул акциялувух.

Ва хьунни МахIачкъалалив Н. Кураевлул цIанийсса Республикалул оьрчIал клиникалий. Ванил мурад бия онкологиялул ва гематологиялул азар дусса оьрчIан кумаг баву. Оьтту булуннин хьхьичI ОМОН-далул зузалтрал анкетардугу дуцIин дурну, цIуллу-сагъшиврул тагьар ххал дунни.
Акциялуву гьуртту хьунни 20-нния ливчусса ­Росгвардиялул зузалт. Миннавух хIурматлувсса донорталгу бия.

– Росгвардиялул зузалтрал цал ттигу ккаккан бунни цивппа иш багьний кумаг бан хIадурну бушиву. Жул оьрчIал азарданияр ххув хьунсса вихшала ххишала хьунни, – тIий, барчаллагьрай бур ОьрчIал клиникалул оьтту бутIаврил отделениялул хъунмур Маржанат ХIусайнова.
КIицI лаган, Дагъусттаннал Росгвардиялул ряхцIалунния ливчусса зузалт ва аьралийтал Аьрасатнал бусравсса донортал хъанахъиссар.

Андриана Аьбдуллаева