Октябрьданул 21-нний, Дагъусттаннал Культуралул ва мазрал кьини, республикалий 14 мазрайсса диктантру 50 000-ниха ливчусса инсантурал чивчушиву баян бунни национал политикалул ва диннал иширттал министрнал къуллугъ чIумуйну бартбигьлагьисса Темирлан АбутIалибовлул.

Ванал бувсунни сайки гьарцагу шагьрулий, районнай диктантру чичлай бушиву, республикалийгу, федерал лагрулийгу миллатирттал мазурдих къулагъас душиврул барашинна дуллалисса даву хъанахъишиву.

«Аьрасатнал халкьуннал тарихрал ва культуралул хIурмат бушиву – жула паччахIлугърал цIакьсса гьанурдур», – увкунни ванал.
Шиккува бусанна Темирлан АбутIалибовлул цаллагу чирчушиву къумукь мазрайсса диктант Дагъусттаннал педагогический университетраву.
Сайки 300 инсаннал чирчунни университетраву 10 мазрайсса диктант. Ва вузрал Дагъусттаннал филологиялул факультетрал декан Зайнаб Оьмаровал кIицI лавгунни, ДГПУ-лул выпускниктал ниттил мазру лахьхьин буллалисса учительтал бухьувкун, вай ялун нанисса никиран маз ябаву буржну ккаклай бушиву ва цаятура тIалавшинна дуну зий бушиву.

МахIачкъалаливсса школардай диктант чичаврил даву цукун най дурив ялтту бувккунни шагьрулул КIулшивуртту дулаврил управлениялул хъунаманал бурж чIумуйну бартбигьлагьисса Шаганэ Баймурзаевагу. Ванилгу кIицI лавгунни, учительнал пиша «хIакьину личIину модраву бакъанугу» яла бусравминнувасса бушиву.
Лакку диктант чирчунни лакрал районнайсса школардайгу. Бусан ливчIунни Дагъусттаннал Национал политикалул ва диннал иширттал министерствалул сипталийну чичлачисса ва диктант ацIилчинмур хъанай душиву. Вагу ца-чIири хъунсса юбилейри.

ПатIимат Рамазанова