Цума-цагу инсан хIарачат буллай чIалан икIай чIявучил чулуха барчаллагьран лайкьсса давуртту дуллай. Хъиннихха! Мукунминнаясса цану ттун чIалан бикIай жул, КIямашрал шяраватусса, цуппагу «Илчи» кказит итабакьлан байбивхьуния шихунмай мунил корректорну зий, цилва буржру дакI марцIну биттур буллалисса, Загьрани Аьбдуллаева.
«Илчилул» юбилейгу хъанай духьувкун, на мудангу му кказит чичайсса, буккайсса, яни му дакIнийхтуну ххирассагу ухьувкун, барча тIий ура Загьранихьгу, редакциялул щалва коллективрахьгу 25 шинал юбилей. ЧIа тIий ура зун цIакьсса цIуллушиву, дуллалимуниву тIайлабацIу!
Ванищалва архIал ччай бур ца-кIива ххуйсса махъ учин ттула шяравудушния.
Загьрани жул КIямашрал жяматран хъинну ххирассар, бусравнугу буссар. Ххирар ванин жулва лакрал миллатгу, ниттил шяравалугу, шяраваллил агьлугу. «Илчилул» корректоршиву дуллалаврицIун, ванил лях-лях чичай ххуй-ххуйсса макьаларттугу. Хъунмасса пагьму бур ванил назмурду ляхъан даврил чулухагу. Итадакьай «Илчилийгу» ванил назмурду, буккултрангу ххирар.
Гьашину май зурул 27-ннийсса 20-мур номерданийгу ца лажин дия Загьранил шеърирдахь, цаннияр ца мяънардал чулуха куртIсса, ккалаккинал дакIнивун бюххансса шеърирду бия.
ЛичIинура куртIсса мяъналийсса дия «Жул жяматрал иялчу» тIисса хъун дакъасса назму. Ва дур Загьранил цилагу шяравачу, КIямашралгу, цайми-цайми жяматирттал дянивгу бусравну, кIулну ивкIсса, хар-хавар бакъа жуятува личIи хьусса Мусаев Мусан хас дурсса назму:
Мискин хьунни жул щар
ина лавгун махъ:
Дурккунни эяллайн
хъиннура гужну.
Ва назмулул ххару ккалаккийни, мяйжаннугу цIунилгу хьхьичI ацIлай чIалай ур жул ххаллилсса чув Муса. Бунагьирттал аьпа баннавча цал!
ДакIнийхтуну барчаллагь, Загьраний! Ина ваниярвагу ялттуну чичлан бюхъу-тяхъа буну, цIуллу-цIакьну, бюхълайнма личIаннав! Амин!
КIямашрал жяматрал цIания
Алхасхъал МахIаммада,
пенсионер
