Учительнал байрандалул кьини наградалун лайкь хьунни МахIачкъала шагьрулул 49-мур школалул директор, Имам Шамиллул цIанийсса Ухссавнил Ккавкказуллал гуманитар колледжрал Попечительский советрал председатель, ДР-лул кIулшиву дулаврил лайкь хьусса зузала, Дунияллул халкьуннал спортрал мастер Аьбдулкарим Айгунов.
Ванан дуллунни СКФО-райсса щалагу Аьрасатнал Жяматийсса наградарттал ва званиярттал комитетрал чулухасса «Почетный гражданин России» тIисса орден.
Награда тапшур дан ва Учительнал кьинилущал школалул коллектив барча бан бувкIун бия Имам Шамиллул цIанийсса Гуманитар колледжрал ректор Тавлу Казакбиев, ДР-лул лайкь хьусса юрист Муслим Даххаев, Гуманитар колледжрал ректорнал маслихIатчи Рапи Абакаров, АьФ-лул промышленностьрал лайкь хьусса зузала ХIажибутта ХIусайнов.

Вара кьини Аьрасатнал муфти Равиль Гайнутдиннулгу хасъсса аьралий операциялул гьурттучитуран кумаг баврихлусса Барчаллагьрал чагъар буллунни Аьбдулкарим Айгуновлун.
Вай наградарттугу ванал цала захIматрайну ва хIарачатрайну лайкь дуллай ур. Школалий каялувшиву дуллалисса хIаллай Аьбдулкарим МахIаммадовичлул тасттикь бунни цува хIакьсса педагог ушиву. Цала даву дакIнийхтуну дуллалисса каялувчи коллективравугу, дустурал дянивгу хIурматрай ур. Ванал хъунмасса опыт бур республикалийгу, республикалул кьатIувгу хъунисса турнирду давривугу.
КIицI лаганна, Аьбдулкарим унгу-унгусса патриотгу ушиву. Украиннал аьрщарай хасъсса аьралий операция байбивхьуния шинмай, ацIийла лавгун ур аьралийтуран цала чулухасса кумаг биян бан. Цимилгу ивунни «Каспий» батальондалул аьралийтурачIан шартIру дакъасса кIанттурдай аьркин дайсса кьай-кьуй, даруртту, тепловизорду, генераторду, дуки-хIачIия, янна ва дуклаки оьрчIал чивчусса чагъарду лавсун.
Букъавсун къабучIир, ванал хъуннасса къулагъасрайн лавсун бушиву хасъсса аьралий операциялий гьуртту хъанахъиминнал оьрчIру ва кулпатру. Ва кьинигу цала мажал бакъашиврух къаурувгун, Аьбдукаримлул аьралийтурал ниттихъайн оьвкуну, миннан ххаллилсса бахшишру дунни.
– ХIакьину билаятрай захIматсса тагьар хIасул хьусса ппурттуву, Ватандалул мурадру буручлай, жула аьралийтурал хъуннасса жаваблувшиву бакIрайн лавсун бур. Укунсса чIумал нагу ттула инсаншиврул бурж биттур буллай ура. ХIарачат буллай ура жагьилтал патриотъталну, хъуниминнал хIурмат буну тарбия бан ва куртIсса кIулшивуртту дулун, – тIий ур Аьбдулкарим.

Каялувчи хIисаврай ва хъуннасса къулагъас дуллай ур коллективрахгу, дуклаки оьрчIахгу. ХьхьичIунну дуклакисса оьрчIру ххари баву мурадрай, Аьбдулкаримлул цимилгу бувцунни Аьрасатнал шагьрурайн ва чIаххуврайсса республикар­ттайн экскурсиярттай.
Директорну зузисса хIаллай, ванал каялувшиндаралусса школа респуликалул хьхьичIунсса школардал сияхIравун бувтун бур. ЦIуну тIивтIусса школалий сакин бувну бур Боевой славалул ва Дагъусттаннал миллатрал культуралул музейрду. Школалий дуклаки оьрчIахь агьаммуниясса ихтилатру бан, насихIатру бусан, чемпионтуращалсса физзарядкартту дан ччя-ччяни оьвчай хьхьичIунсса спортсментурайн, машгьурсса инсантурайн.
КIицI лаган, Аьбдулкаримлул ппу МахIаммадгу (аьпа баннав цал) бусса оьрмулий учительну зий ивкIун ур. Нину ПатIимат хIакьинусса кьинигу оьрчIан кIулшивуртту дулаврил ххуллий захIмат бихьлахьисса инсан бур. Нинугу-ппугу ДР-лул кIулшиву дулаврил лайкь хьусса зузалтри.
Наградартту барча тIий, чIа тIий буру Аьбдулкаримлун цIуллушиву, давриву хьхьичIуннайшивуртту ва тIайлабацIу.

Имара Саидова