Гьарца шинал октябрьданул 3-нний кIицI лагай ­Оьрмулул бугьараминнал кьини, цал ххишалану дакIнин бутлай жула лагма-ялттусса оьрмулул бугьарасса инсантуран ургъил, хIурмат, аякьа аьркиншиву. Ва кьинилуцIунсса давуртту дунни Лакрал райондалул щархъавугу.

Шяравусса оьрмулул бугьарасса хъамигу бавтIун, ва кьини вайннащал чяйлухунсса хавардайну, яхши-хашрайну гьан дунни ШавкIравсса Аьрасатнал Халкьуннал аслийсса культуралул центрданул ва библиотекалул зузалтрал, Лиана Халиловал ва Фрунзина Кьадиевал. Ссупралухсса хавардацIун балайрдугу увкунни. Ххюлуссуннал шяраваллил культуралул къатлул ва библиотекалул зузалт оьрмулул бугьараминначIан шаппа-шаппай бивунни, вайннахь ва кьини барчагу дурну, пиш-каш дунни чIири-хъунсса бахшишру.

ГьунчIукьатIрал дянивмур даражалул школалул дуклаки оьрчIру цалва классрал каялувчи Асият Маммаеващал «Оьрмулул бугьараминнансса кумаг» тIисса акциялул лагрулий бивунни ­оьрмулул хъунисса инсантурачIан шаппай, бунни миннан ичIаллил давурттацIунсса кумаг.

Бадрижамал Аьлиева