Сентябрьданул 27-нний Аьрасатнал Банкрал Дагъусттаннайсса отделениялий хьунни гьарца шинал дуллай аьдатравун дагьсса «ТIиртIу нузкьунттал кьини».

Шикку хьуминнахь Банкрал зузалтрал бувсунни арцу къалпсса дусса-дакъасса цукун кIул бувайссарив, арцуцIа хьуну къаличIаншиврул, вайннул ялун цаймигу кIункIу дуваншиврул ци дуван аьркинссарив ва ци къааьркинссарив. Банкрал ва кьинисса хъамал гьуртту хьунни финансирттал викторинарттай, хасъсса яннагу ларххун ва бронироват бувсса машиналийгу щябивкIун, ххал бунни инкассаторнал пишарайсса цалва бюхъу-бажар, вичIи дирхьунни лекциярттах, бавтIунни пазллу.

Ва кьинилийннин хIадур дурну дия хасъсса выставка, вагу гъирарай ххал дунни хъамаллурал. Банкирал тарихчинал бувсунни ванияр ацIра аьсрулул хьхьичI, Дарбантлив монетный двор дусса чIумал, арцуцIун бавхIуну хъанай бивкIмуния.

Ва кьини Банкравун бувкIминнан ххуйсса сант дагьунни цалла кIулшивуртту авадан дувансса, дунияллухсса бургаву гьарта-гьарза дувансса, хьхьичIара финансирттал дунияллий хъанай бивкIмуния ва ттизаманнул финансирттал технологиярттая кIул хьунсса. ОьрчIру гьуртту хьунни хасну цанна куну хIадур дурсса тIуркIулул журалийсса дарсирдай ва мастер-классирттай.
Хъамакъабитулун рирщунни арцул дарвагирттащалсса ва арцул хъуни чагъардащалсса суратру.

Бадрижамал Аьлиева