Барчаллагьрай ура
Уттигъанну ххалал лакьлакьисса чIун дия. Нагу ттула шаппасса ца-кIива яттил хIайвандалун ххулув бан увкссияв. ЧIиникIрах мадарасса лухччи дурцуну, ххалал ттукку бахIлахIийни, иттав кьуртIусса дагьуна хавар бакъулий. Цукун бунугу яхI бувну, ттукку ххалал бавхIуну шаппай биян бувссия. Иттавсса къюву хьхьара къархьуна. ЦIан ларкьусса чIумал ххуллийн увкра. Ваччав азарханалийн гьан пикри хьуна, анаварсса кумаграйнгу шаппай оьвчин ламус хьуну. Машиналул ххуллийн уккайхту, шагьрулия нанисса ца машина бувккун, га бацIан бувну, ттула мурад бусав. ЦIа-бакI цIуххин къавхьуна машиналул щупирнахь, цув цIуллу аннав. – Ачу, щяикIу, – куну, азарханалул хIаятравун иян увнав. Ганахьгу барчаллагь куну, лавгра азарханалул Анаварсса кумаг бусса кабинетравун. Гава цIана ттул чIарав хьуна хIакин Щамххалов Гьарун ва медсестра Шюъбанат. Ягу марцI бувну, дарув бувтIуна. КьутIлатIисса къювугу духларгун, рахIатшиву хьуна. Ялагу бутIинсса дарувгу буллуну, Анаварсса кумаграл машиналий шавай иян унна.
Амма кIюрххицIун къюву ялагу дайдирхьуна. Пикри хьуна Гъумукун яруннил хIакинначIан гьан. Гъумуксса кIулсса инсаннайн оьвкуну, хIалкьазия бусав. Ганал му отпускалий буссар, на миннат баннача, ухьхьу увкуна. Гъумукун нанисса шяравучу МахIаммадлул на иян увнав. Лавгра азарханалийн. Гава цIана бувкIуна отпускрайсса яруннил хIакин Щурпаева Рукьижат. Ванил, хасъсса аппаратрах я ххал бувну, кьуртIусса дурккуна. Дарув бувтIуну, къювугу рахIат дурна.
Яла махъ ттун яруннил цIуцIавуртталшиврий РукьижатлучIан багьсса цайминналгу вания ххуйсса тIий бавуна.1995-ку шинал Дагъусттаннал медициналул институтгу къуртал бувну, шикку зий бур Рукьижат.
На хъунмасса барчаллагь учин ччай ура Гьарун Щамххаловлухь ва, отпускрай бунува бувкIун, ттулсса бувсса Рукьижат Щурпаевахь. Хъинсса инсантал дунияллий тачIаввагу чан бакъассар. Барчаллагьрай ура ва ишираву ттунма бучIи лявкъусса хIакинтурайнгу, машинарттал щупиртурайнгу.
Арсен Аьбдуллаев,
ш.ЧIяйми
ДакIнийхтуну барча дуллай буру лакрал агьалинангу, гъан-маччаминнангу, дустурангу, уртакьтурангу бусравсса, хIурмат лавайсса Анвардул арс Исрапилов Артурдул оьрмулул 65 шинал юбилей.
ЧIа тIий буру чIярусса цIуллусса ва буллугъсса шинну. Вания тинмай бутантIимур оьрмулувугу чан къахьуннав вин вила чумартсса дакIнин лавхьхьусса кьисмат, ххуй-хъиншивуртту, вилацириннаясса ххаришивуртту!
ТтурчIиял ккурандалул
чулуха Растиван Беков
Орденну, медальлу вин ссан
аьркинссар:
Миннуйну вил кьимат бищун
къашайссар.
Вил кьимат ччянива бивщуну
буссар
Вийн барчаллагьрайсса
халкьуннал дянив.
З. Мирзоев
ТтурчIиял шяравасса ххаллилсса чув, полковник, Оьмардул арс Сулайманов Амжадлун вай гьантрай бартларгунни 77 шин.
Чачаннал аьрщарая 1999 шинал Дагъусттаннайн ярагъуннил балгусса къачагътал ххявхсса ппурттуву республикалул МВД-лул Дазурдал управлениялул хъунаманал хъиривчуну зий ивкIсса Амжад тай цIаран лавхъсса гьантрай ЦIуссалаккуй сакин бувну бивкIсса Координациялул штабрал хъунаману ивкIссар ва ххаллилну биттургу бувссар цайвасса буржру.
ДакIнийхтуну барча дуллай буру Амжадлухь ниттил увсса бусравсса кьини. Му кьинилул ххаришиву жулгу ххаришивур, му кьинилул ххуйшиву жулгу ххуйшивур.
Аьзизсса Амжад! ЧIа тIий буру чIярусса цIуллусса шинну, цIу-цIусса ххуй-хъиншивуртту! Яаннав ина Заннал винагу, жунгу, цинявппа лакрангу!
ТтурчIиял жямат
