Сентябрьданул 27-нний Гъумук дянивмур даражалул школалий хьунни Аьрасатнал Виричу НурмахIаммад ХIажимахIаммадовлул аьпа абад баврин хас дурсса шахматирттай буккаврил республикалул турнир.

Ванийн бувкIунни МахIач­къалалиясса, Каспийскалиясса Лакрал, ЦIуссалакрал ва Ккуллал районнал шяравасса хъамал. ХIурмат лавайсса хъамаллуравух бия Лакрал райондалул бакIчи Юсуп МахIаммадов, Аьрасатнал Виричу НурмахIаммадлул нину Сапижат Мазаева, райондалул администрациялул цаппара зузалт, Гъумучиял школалул директор Соня Макьаева, школалул учительтал ва цаймигу.

Турнир тIитIаврий махъ лавхъунни Юсуп МахIаммадовлул:
– Ххирасса гьалмахтал, хIакьину жува шиккун бав­тIун буру Аьрасатнал Виричу, гвардиялул хъунама лейтенант НурмахIаммад ХIажи­махIаммадовлул аьпа абад баврин хас дурсса республикалул турнирданийн, уттигу цал дакIнин утан хасъсса аьралий операциялий цала аьралий бурж биттур буллай, чувшиву ва къучагъшиву ккаккан дурну, Аьрасатнал Виричунал бюхттулсса цIа ларсъсса НурмахIаммад. Жува пахрулий буссару жула лаккучунал гьунардания. Аьралий операция байбивхьусса кьинирдайва Аьрасатнал саллатIнал ва хIаписартурал ккаккан дуллай бивкIссар чувшиврул ва виричушиврул эбрат. Ватан ххирашиврул ва виричушиврул эбрат ккаккан дурминнал кьюкьлувух цалчинману ивкIссар жула НурмахIаммад ХIажимахIаммадов, ванал, цува ивчIансса кIулну, бунува, ххассал бувссар цала гьалмахтал националистътураща. НурмахIаммад дунияллия лагаву хъуннасса хажалатри ванал нитти-буттангу, мачча-гъанссаннангу, жунна цинявннангу. Жула ватанлувнал гьунардания кIулссар щала Аьрасатнан. АьФ-лул президент Владимир Путиннул ванал гьунарданул хIакъираву увкуссар: «Ва дагъусттанлуври, ва лаккучури, жува ца миллатру, жува, циняв цачIун хьуну, махъунай айщун айссар ччима душман».

НурмахIаммад ХIажимахIам­мадов спортрахун машхул хъанай ивкIссар школалий дуклакисса чIумал райондалул ОьрчIал ва чIава жагьилтурал спортрал школалий, цIана ванин дирзун дур Аьрасатнал Федерациялул Виричу НурмахIаммад ХIажимахIаммадовлул цIа. Ванал цIа дирзун дур тамансса кучардан, школардан, билаятрай дуллай бур ванал цIа абад дувансса мероприятияртту. Жугу дуллай буру мукунсса мероприятиярттавасса ца – шахматирттай буккаврил республикалул мукьилчинмур турнир, – увкунни райондалул бакIчинал.

Аьрасатнал Виричунал ниттил, Сапижат Мазаевал, барчаллагь увкунни шахматирттал турнир сакин дурминнахь, турнирданий гьуртту хъанахъиминнахь ва бувкIсса хъамаллурахь. Турнирданий гьуртту хъанахъисса оьрчIан чIа кунни тIайлабацIуртту, куртIсса аькьлу-кIулши ва ххувшаву.
Лакрал райондалул Культуралул, жагьилтурал политикалул, туризмалул, спортрал ва ЦБС-рал центрданул директорнал хъиривчу Малик ХIусманов:
– ЦIана дуллалисса шахматирттал турнир хъанай дур мукьилчинмурну. Шиккун бувкIун бур Лакрал райондалийсса школардая, МахIачкъалалия, Каспийскалия, ЦIуссалакрал райондалия, Ккуллал райондалия шахматирттай буккавриву хьхьичIунсса хIасиллу хьун дурсса оьрчIру.

Махъ лавхъунни мукунма турнирданул хъунама судья, республикалул шахматирттал федерациялул исполнительный директор Зураб Салмановлул:
— ХIурмат лавайсса гьурттучитал ва хъамал, хIакьину жура дуллай буру Аьрасатнал Виричу, жула ватанлув НурмахIаммад ХIажимахIаммадовлун хас дурсса шахматирттал турнир. На барчаллагь тIий ура ва турнирданул циняв сакиншинначитурахь. Ва укуннасса спортрал мероприятие дакъарча, ва дур хасъсса аьралий операциялий ватандалул мурадру буруччаврил цIаний жан дуллусса жула хIакьсса Аьрасатнал Виричунал аьпа абад буллалисса лишан. НурмахIаммад ХIажимахIаммадов хьуссар хIакьсса чувшиврул ва виричушиврул эбратну.
Яла Гъумучиял школалул дуклаки душваврал дурккунни Аьрасатнал Виричунахасса назмурду. Муния махъ дайдирхьунни шахматирттал республикалул турнир. Муний гьуртту хьунни сайки 60 оьрчI-душ.

Турнирданул хIасиллу:

11 шинавун бияннинсса группалуву душваврава 1-мур кIану бувгьунни Амания Салмановал; оьрчIарава 1-мур кIану бувгьунни ХIадис Ихиндановлул, 2-мур кIану – Якьуб Сулаймановлул, 3-мур – МухIаммад Ихаевлул.
15 шинавун бияннинсса группалуву душваврава 1-мур кIану бувгьунни Салимат Аьлидибировал, 2-мур кIану – Амина Хиряевал, 3-мур кIану –Амина Айдиевал; оьрчIарава 1-мур кIану бувгьунни Рамазан Сулаймановлул, 2-мур кIану – Адам Хиряевлул, 3-мур кIану – Даниял Ашамаевлул.
19 шинавун бияннинсса душваврава 1-мур кIану бувгьунни ФатIима МахIаммадовал, 2-мур кIану – Шуаьна Хановал, 3-мур кIану – Баянат Къушиевал; оьрчIарава 1-мур кIану бувгьунни Багьауттин Буттаевлул, 2-мур кIану — МахIаммадкамил МахIаммадовлул, 3-мур кIану – Арслан Айдиевлул.
Шанмагу группалува ххув хьуминнан ва призертуран буллунни дипломру, медальлу, кубокру ва арцуйнусса заварду.
«Приз зрительских симпатий» номинациялий награда дуллунни Наргиз Ибрагьимован, «За волю к победе» тIисса кубок буллунни МухIаммад Куяевлун.

ХI.Аьдилов