Дагъусттаннал бакIчи Сергей Меликовлул сипталийну сентябрьданул 8-нний республикалий дайдирхьуссия «Доблесть Гор» тIисса региондалул программа. Ва дур хасъсса аьралий операциялул гьурттучитуран хас дурсса «Время героев» тIисса федерал программалул аналог.
Сентябрьданул 15-нний байбивхьуссар программалул цалчинмур модуль. КIулшиву дулаврил программалул бутIуву даврил опыт кIибачIлачIисса ихтилатру бунни ДР-лул ХIукуматрал председательнал цалчинма хъиривчу Руслан Аьлиевлул, ДР-лул экономикалул министр ХIажи Султановлул, экономикалул доктор, РАНХиГС ВШГУ-лул бизнес-тренер Максим Кисилевлул.
РАНХиГС ВШГУ-лул Лидершиврул ва управлениялул компетенциярттал центрданул директор Елена Чепурновал бунни коммуникациярттан хас бувсса мастер-класс.
ПаччахIлугърал политикалул ва управлениялул системалул масъалартту лахьхьаврин хас дурсса цалчинмур модульданул даву дайдирхьунни хасъсса аьралий операциялий чувшиврий жан дуллусса Муртаза Султановлул уссу ХIажи Султановлул.
Ванал балжину бувсунни цала каялувшиву дуллалисса ведомствалул даврия, региондалий иширайну зузи дурсса программарттая, проектирдая, экономика хьхьичIуннай даврия ва хIакьинусса экономикалул тагьардания, дуллунни гьурттучитурал буллусса суаллахьхьун жавабругу.
Спикертурал кIицI ларгунни региондалийсса миллатрал проектру ва миннул мурадру. Гьурттучитуран хъунмасса мюнпат хьунни теориялул ва пишакаршиврул магьиршиву ларай давриву.
«Деловой русский язык» тIисса темалун хас бувсса лекция бувккунни педагогикалул элмурдал доктор, ДГУ-лул оьрус мазрал кафедралул хъунмур Тамара МахIаммадовал. Дагъусттаннал Кадровый центрданул каялувчинал хъиривчу Аьбдул Абакаровлул доклад бия X, Y ва Z никирал пишакартал хьхьичIунмай баврил кьяйдардаясса.
«Доблесть гор» программалул лагрулий гьурттучитурал бунни Къизлардал Электромеханикалул заводрайнсса аналитикалул экскурсия. Шикку заводрал гендиректор Ибрагьим АхIмадовлул ккаккан дунни промышленностьрал даву, бувсунни хьунадакьлакьисса захIматшивурттая ва дузрайн дуккан дувансса давурттая.
Экскурсия бувну махъ гьурттучитурахь программалул кIулшиву дуллалисса дарсру дирхьунни ДР-лул миллатрал политикалул ва диннал иширттал министрнал бигарду биттур буллалисса, Аьрасатнал Виричу, «Время героев» тIисса программалул гьурттучи Темирлан АьбдулмутIалимовлул ва РАНХиГС ВШГУ-лул Карьералул центрданул директорнал хъиривчу Гоар Агаджаняннул.
«Сарыкум» конференц-залдануву «Доблесть гор» программалул гьурттучитуращал ва насихIатчитуращал хьунаавкьунни Дагъусттаннал бакIчи Сергей Меликов.
– ЦIанасса бигьа бакъасса ппурттуву жула хьхьичI бивхьусса агьамсса масъалартту хъанахъиссар агьалинал чулухасса тIалавшиннарду щаллу дан кIулшиву. Вайннувун багьлагьиссар ЖКХ-лул, электроэнергиялул ва школарду, садикру, азарханартту бан ккаккан дурсса аьрщарал масъалартту.
Ттул хъуннасса вихшала дур, зула аьралий опытгу ишла бувну, тIайламунил чул бувгьуну, хьхьичI бивхьусса мурадру бартбигьавриха зунссару тIисса.
ХIакьину Дагъусттан анаварсса бущилий хьхьичIунмай хъанахъисса субъектран ккаллину бур. ХьхьичIва-хьхьичI ва асар хъанай бур шяраваллил хозяйствалул, дукиялул, промышленностьрал ва цаймигу бутIраву. Ттун хъинну ччива зул кумаграйхчIин Дагъусттан хьхьичIунмай шаврил бущи ваниярвагу лавай бан, – увкунни Сергей Меликовлул.
Ва программалул шамилчинсса кьини человеческий капитал хьхьичIунмай баврил эксперт Роман Петиннул каялувшиндарай хьунни «Управленец XXI века. Навыки современного руководителя» тIисса цIанилусса тренинг.
Проектрал гьурттучитал бивунни Республикалул цалчинма президент МухIу Аьлиевлул 85 шинал юбилейран хас дурсса элмийсса-практикалул конференциялийнгу.
«Доблесть гор» программалул лагрулий хьунни ДР-лул БакIчинал ва ХIукуматрал администрациялул каялувчи МахIач Оьмаровлущал ва ДР-лул ПаччахIлугърал къуллугърал, кадрардал ва паччахIлугърал наградарттал масъалартталсса буллалисса управлениялул хъунмур Земфира Къашкъаеващалсса хьунабакьаву. Вайннал, гьурттучитуран хасъсса маслихIатругу бувну, цахьхьунма буллусса суаллахьхьун жавабру дуллунни.
Вания тихунмай программалул гьурттучитурал шикку ларсъсса кIулшивуртту ишла дантIиссар личIи-личIисса сферардавусса практикалул давриву.
Имара Саидова
