ДР-лул Халкьуннал Мажлисрал депутатътурал 2021 шинал октябрьданул 14-нний Дагъусттаннал каялувчинал къуллугърайн увчIуссар Сергей Меликов. Ва региондалий каялувшиву дуллай уссар 2020 шинал октябрьдания шинай.
Сергей Меликов увну ур 1965 шинал сентябрьданул 12-нний Москавуллал областьрай Орехово-Зуево шагьрулий аьралийчунал кулпатраву. Ванал ппу Аьлим Нур-МахIаммадович Меликов (1932-2012ш.ш.) Дагъусттаннаяссар, лазгиричури. Къуллугъ буллай ивкIссар СССР-данул МВД-лул виваллил аьралуннаву. Нину Татьяна Николаевна педагогри.
1986 шинал Сергей Меликовлул къуртал бувссар Саратовуллал аьраяллил училище. 2011 шинал ванал бувккуссар АьФ-лул Ярагъбу гужирдал Генеральный штабрал аьраяллил академия.
Гьуртту хьуссар Чачаннал цалчинмур дяъвилул иширттавух.
2011 шинал сентябрьданий ивтссар АьФ-лул Ухссавнил Ккавкказуллал региондалий контртеррористический операция баврил ЦачIунбув аьралуннал группировкалул командующийну.
2014 шинал майрал 8-нний Сергей Меликов ивтссар АьФ-лул МВД-лул виваллил аьралуннал Хъунмур штабрал хъунаманал цалчинма хъиривчуну.
2014 шинал майрал 12-нний, Аьрасатнал президентнал ХIукмулийн бувну, ивтссар Президентнал Ухссавнил Ккавкказуллал Федерал округрайсса вакилну.
2016 шинал июльданул 28-нния 2019 шинал сентябрьданул 30-ннийнин зий ивкIссар АьФ-лул Национал гвардиялул аьралуннал Федерал къуллугърал директорнал цалчинма хъиривчуну.
2019 шинал сентябрьдания шинай – Аьрасатнал Федерациялул Советрал членну,Ставрополлал крайрал исполнитель властьрал органдалул чулухасса вакилну.
2020 шинал октябрьданул 5-нний АьФ-лул президентнал ХIукмулийну Сергей Меликов ивтссар ДР-лул БакIчинал буржру чIумуйнусса бартбигьлагьиману.
2021 шинал октябрьданул 14-нния шинай Сергей Меликов тIайлабацIу буну бартбигьлай ур Дагъусттан Республикалул каялувчинал къуллугъ.
Жула Республикалул бакIчинал юбилей барча дунни Аьрасатнал президентнал Владимир Путиннул.
ХIадур бувссар ХI.Аьдиловлул
