Ххирасса Артур Анварович! Мудангу вил оьрмулул ххуллул хIисав ласласисса чIумал, ххари хъанан икIара ттула мачча-гъанминнаву дурсса, дуллалисса давурттайну лахъсса даражалийн гьаз хьусса ва архIала инсаншиврул яла лахъмур ххуттая хIура къавхьусса инагу ушиврия. Пахрулий ура! Укун вияту пахру буллансса цIакьсса хIучча буссар циняв цIувкIуллахьгу, лакрахьгу, Дагъусттаннал агьалинахьгу.
Щаллагу дунияллийх цIа ларгсса, утти духлагаврил зуманив дирсса Цалчинмур ЦIувкIуллал шяравалу цIу дуккан даву мурадрай ина хъуни-хъунисса давуртту дурссар: пагьламантурал республикалул фестивальлу, Совет Союзрал кIийла Виричу АхIмад-Хан Султаннул цIа абад дуллалисса ва гьаз дуллалисса мероприятияртту. Пагьламантурал школалул, гьунар бусса аьлимтурал, элмулул, творчествалул, гьарца аралул инсантурал чIарав авцIунна.
Хъамакъаитайсса Анвар Кьурбановичлул, вила ххаллилсса буттал, даву гихуннайгу дюхъан дуллай, ина хъунмасса захIмат бивхьуссар. Вилва гьунар ва бюхъугу ккаккан бувссар захIматсса ппурттуву ЦIуссалакрал район хьхьичIуннай дуллайгу. Дагъусттаннал бакIрачIан кьини дурксса чIумал, уртакьтуращал-ополчентуращал ярагъгу кIунттихьну гьаз хьуссара билаят буруччин, Бущихъав ва ЦIуссалаккуй талай ивкIссара.
Каялувчи хIисаврай вил гьунар так ЦIуссалакрал райондалий бакъагу, республикалул хъун шагьрулийгу яргну аьч хьуссар. Вийнна тапшур дурсса даву, ци журалул духьурчагу, лахъсса даражалий дувайсса вил цIа багьавай дагьссар Дагъусттаннал паччахIлугърал каялувчитурал элиталувун. Цуксса ххари хъананссия вия рязину Анвар Кьурбанович!
Ина ххаллилсса, аслийсса зунттал хъаннил – ниттил Мариял ва виламур ниттил Зулпал ххуй-ххуйсса хасиятру ларсъсса Заира Аьбдулхаликьовнащал цIакьсса кулпат бунни. Зул ташулул хIасиллугу ххуйсса хьунни: хIалимсса, бавкьусса кулпат, ххуйсса оьрчIру ва миннал наслу.
Ххирасса Артур Анварович, щалва кулпатрал цIанияту барча дуллай ура ина увсса кьини! Вил гьунаргу, бюхъугу аргъирайсса чIунни, гихуннайгу миллатрангу, республикалул агьалинангу мюнпатрансса хъунисса давуртту дуллансса цIуллушивугу, кьудратгу чIа тIий ура вин!
АьбдурахIман Халилов
