Аьрасатнаву терроризмалийн къарщисса, Чувшиврул дарсирдайну, Вирттаврал гьайкаллацI тIутIив дишаврийну ва цаймигу патриот зумунусса мероприятиярттайну кIицI лаглагисса кьини МахIачкъалалив 8-мур лицейрал чIирай, СВО-лий шагьидну жан дуллусса школалул выпускникнал, СантIуев МахIаммадал цIагу, суратгу дусса мармарчарил ула тIиртIунни.
МахIаммадал чувшиврий жан дуллуссар 2024 шинал январь зурул 23-нний Запорожскаллал областьрайсса Вербовое тIисса шяраву. Къизгъинсса талатавриву ккаккан дурсса чувшиврухлу лайкь хьуссар ордендалун. МахIаммада дунияллия лавгун махъ Чувшиврул орден ванал кулпатрахьхьун дуллуссар.
Школалул учительтурал коллектив, дуклаки оьрчIру, мачча-гъанми, дустал, гьалмахтал бакъагу, мероприятиялийн бувкIун бия МахIачкъалаллал администрациялул ва цайми учреждениярттал вакилтал.
Улттуя пардав дукьансса ихтияр дуллуна МахIачкъалаллал мэрнал хъиривчу МахIаммад Амирхановлухьхьун ва Виричунал ниттил ппу МахIаммадсяид Кьурбановлухьхьун.
«Ва школалул дуклаки оьрчIай хъуннасса жаваблувшинна дикIантIисса давур хIакьину дуллалисса. Ва улттул циняв жува буржлув буллалиссару Ватандалул мурадру буручлай жанну ххира къадурми хъамакъабитан. Укунсса Вирттаврал гьунардал ялун нанисса никирангу цивппа цукун яхIлувсса инсантурал наслу буссарув дакIнин бутлатиссар, миннал оьрмулул ххуллурду ва гьунарду эбратну хъанахъиссар», – увкунни МахIаммад Амирхановлул.
МахIаммадсяид Кьурбановлулгу кIицI лавгунни МахIаммадал ппухълуннаву Буттал кIанттул цIанийсса Хъун дяъвилий хьхьичIун ливчусса чансса бакъашиву, душнил арснайнгу ирсирай чувшивугу, кьянкьа-кьурчIишивугу, зунтталчунал хIакьсса цаймигу хасиятру диршиву. Бувсунни МахIаммада гьармуниву итххявхсса, бюхъу бусса, дирисса жагьил ивкIшиву.
«МахIаммадал чIявусса бия дустал, дурккун дакI дулун хьуну икIайва. Ххирая ичIувацири, мачча-гъанми, буттал лажиннагу къакIулну хъунма хъанантIисса душ. Аьчухсса, пиш тIийнасса ия», – увкунни ванал.
Мероприятиялий гьуртту хьунни лицейрал Ппухълуннал советрал хъунама, цила чIумал Авгъанисттаннай талай ивкIсса МахIаммадрасул Сулайманов. Ва Дагъусттаннал жагьилтурал лайкь хьусса наставникгу ур. Гьуртту хьунни гвардиялул майор, аьралий иширттал гьурттучи, ГСВГ-лул Ветерантурал советрал хъунама АхIмад Маммаев ва цаймигу бусравсса инсантал.
Махъру лавхъунни МахIаммадал ниттил, Мадина СантIуевал, ванил ниттил, Чимназ Кьурбановал.
МахIачкъалаллал Администрациялул аппаратрал хъунаманал хъиривмурну зузисса ПатIимат Пидуриевал, МахIаммадал ниттил ссурахъил, бувсунни ва щалвагу агьулданун ххирасса, цува ивсса, увкIсса кIану чаннал буцIин байсса жагьил ивкIшиву.
«Жул кулпатрал талихIрал ттарцI ия. ЧIивинияцIава чаннаннил дакI дусса ия, цаламур махъ бацIан буллалисса. Дуниялгу жун цинявннан цIан дурну лавгунни, ца шин дакъа, цимирагу ацIрахъул шинну гьарчагу, я ттун, я кулпатран, я ттулми ва Мадиналми уссур-ссуннан, цалвамур кулпатран, гьалмахтуран тачIав дакIния къауккантIиссар. МахIаммада гьар кьини, гьарца лахIзалий уссар жул дянив, буссар жул дакIурдиву ванал муданмасса пишгу», – увкунни буттал СантIуев ХIусайн СантIуевлул.
Ца зумату кунма, бюхъу бусса, зирангсса МахIаммада чичрулул ивтссания, цукссагу даражалийн лахъанссия тIий бия махъру лахълахъисса махъмигу.
Бусан ливчIунни, ноябрь зуруй 2024 шинал, МахIачкъалалив имам Шамиллул цIанийсса кIичIираву, МахIаммада ялапар хъанай ивкIсса къатрал чIирай ванал суратгу, цIагу дусса мармарчарил ула дацIан дурну диркIшиву.
ПатIимат Рамазанова
