Лакку билаят. Ттул буттал кIануй. Хъун ЦIувкIуллал шяравалуй. Дунияллийх цIа ларгсса , яхIлувсса вирттаврал кюруй. Цимигу шинай ппухълуннал гьухъай, вирттаврал оьттуй бацIан бувсса къалай. Цири бувкIсса хIакьину вил бакIрачIан? Цивхьуссар яхI бусса ЦIувкIуллал агьулданун? Та, чув бяйкьуссару жува? Цумур чIумал лавгссару къатIайласса ххуллийх? Тания шинмайри жува вакссава буттал шяравалу сан къадувай хьусса? Цукссава ччяни хъамабивтссар жунма буттахъал захIмат, ниттихъал дардру, жулла оьрчIшиву ва жагьилшиву?
ХIакьину мискинну, ялгъузну лирчIун дур лухччив ва хъуру, цулуцалт ва хъудугьулт бакъа. Арду ва майданну — тIуркIу бансса жагьилтал бакъа. Къумасса кIичIиртту — тяхъасса оьрчIал чIурду къабаллай. ХIакьину школалул хIаят урттун тартун, кувссайн кIура дарну дур. Жямат бухлагайхту, кьаркьун най дур ратIру ва кьулларду. Щин ласун бувкIсса оьрчIал къаралтив пар учайсса иш бакъар. КьуллардачIасса тIуркIурдуми пянцI, лянкка, гъутIа, лякъу, бугьу, чIутIрай буккаву…Вайннуя хаварвагу бакъассар жулвами оьрчIан.
КкурчIа…Буттахъал ккурчIа. Цикссагу, оьккиссагу, ххуйссагу, бувхIусса буттахъал ккурчIа. Жяматрал цикссагу мурадру бартбивгьусса ккурчIа. Цикссагу хавардал бардулт хьусса, инсантал щябикIлакIаврил бювчIуну, ттиркьюкьив кунма, пар-пар тIисса загълунсса чартту. Цикссагу кьассаврду бувсса, цикссагу дуаьрдал ва иширттал барашинна дурсса ххялчIив. ЧIиртту кIяла хьусса, баркьутругу лавххун щябивкIсса къужрал хьхьичIух гьан нач хъанай, цIан ххуллурдавух, къума кучардавух заназисса хъами ва жагьилтал. Мангъулнал ордалуща, Ираннал шагьтураща духлаган дан къархьусса, захIматсса паччахIнал чIунну, инкьилабрал террор, Граждан дяъви, Буттал кIанттул цIанийсса Хъун дяъви, ккашилсса шинну дурхIусса буттал шяравалу жура духлаган ританшивруллив ядурсса?
Ккашил къия дирсса хъуннабавахъал дакIру щавари дуллалисса хаварду циванни жунма хъамабивтсса? Тай ккашил заманнай жулва ттаттахъул ва бавахъул вай хъуруннал ва лухччал бакъарив ябувсса? Къурувсса къалмул, кIучIалттал, лухччайсса дукай ххяххиялул нагьар дуллай бакъарив яхьусса? Буттал аьрщарал уртту-щинал бакъарив ябувсса? Жуварув яла аькьлу буми, ягу кьини дуркми, укун шяравалу духлаган дан кьариртун ливхъсса? Лухччивгу, зунттурдугу, щингу, аьрщигу дуний дунура, бухлавгун нанисса ЦIувкIуллал жямат! Буккияра кьатIув, чантI учияра шанава! Мазия хьун битару буттахъал захIмат. Леркьмур дацIан дара, дакъамур щаллу дара, буттахъал къатри маритару эяллайн дуккан. Лахьхьин бара зулва оьрчIан шяравунсса ххуллу, буттал къатрачIансса куча. Ххал дара жулла лухччив, арду, хъуру. Ватсаправу ва интернетраву щаллу къабуллай, бувккун жяматравун, бивну шяравун, щаллу бара жяматрал мурадру. Август зурул 1-нния 7-ннийн бияннин гьар шинал баян бувссар Шяраваллил нюжмар. УчIан ччисса инсан кулпатгу бувцуну увкIун, ми гьантри шяраву гьан буван. Ми гьантрай дуллантIиссару субботникру, жура-журасса давуртту. Дуванмунил план дурну хьхьичIра. Мадувару хьхьарашиву.
ХIажимурад Исяев
Ххюттуршунниха ливчусса инсантал бусса ЦIувкIуллал ватсап-группалувусса ХIажимурадлул ва леххаврил ххуллийсса оьвчаву ттун хъинну дюрххуна. Оьрму шяраваллил оьрчIан кIулшивурттугу, тарбиягу дуллай гьан бувсса НухIлул (аьпа бивул) ва Аьишатлул арс укун шяраваллил бучIантIимуний дакIцIуцIаву дусса ушиву тамаша бизансса зат бакъар. Агьалинал дакIурдивун кьутIа тIун аьркинсса чIун дуркIун дур, Аллагьнал язи угьайхьунссар, тIайла увайхьунссар мукун кьутI учинмагу. Щил-бунугу ЦIувкIуллал къапурдайнгу кьутI учин аьркинну бия. Лапва чIал хьуну лякъиннин. ЦIуницIа уттара дуклай, цIулаглагисса шяраваллавун багьтари, нагу цIунилва-цIунил кьуцIу буллан бикIара: цива-ци тахсир хьуссар жуй, ЦIувкIуллай, жул оьрчIзаманнай къилигъ дуну дарцIуну диркIсса къатри яруннил хьхьичI эяллайн дуклай, шяраваллил диц-куц, чIалачIин я щунан язугъ хьунсса даражалийн дагьан ритан?
Уттигъанну машгьурсса альпинист, лакрал лайкьсса арс Зиябуттин ХIажимирзаевлучIан хъамалу ГьунчIукьатIув лавгсса кIанай, кIайннал школалул учительтурал цивппа жул ЦIувкIравсса загълунсса кIаланнай, магъайсса ххялчIай тамаша бувну бивкIру, транспорт дакъасса заманнай тай цукун ххилай бивкIссар тIива. Ваниннин цаппара шиннардил хьхьичIва хIакин, историк Исмяил Аьлиевлул социал сетирдай дирхьуна ттул ттаттал, Аьбдуллагьхъал Оьмардул, Бюрчурдил ххуллийсса къатрал сурат. Аьщуйн щуну чичиннив, къатрая лирчIсса эяллу. «Эяллу лирчIун духьурчагума, чIалай бур вай кIизивулийсса авкьатсса къатри цIакь бусса инсаннал дуршиву», – укун тIий чивчуна Исмяиллул.
Буниялттунгу, ца чарувагу багьан битан хIайпсса къатри дуссия. Колхозралминнул хъирив яла ппаллу чIявуми къатригу духьунссия тIун бикIара, цалчинмур зивулий хъунисса, гьартасса ппаллу буссия. Шяравусса чIявуми агьлу кунма, ттул Оьмар ттаттагу хIухчу ия. Ттунма дакIнин хъинну асар хьунсса, «Илчилул» батIаврий бавсса ва хаваргу бусанна. Аьпа биву, машгьурсса чичу, филологиялул элмурдал доктор Абачара ХIусайнаевлул (ванал ЦIувкIрав хъамал бия, гьарайзу ХIайдахъул) бувсуна, ЧIяйннал базаллуву ятту кьювкьуну бахлай унутIий, 12 хIухчил вив лавсун, му аттансса кьаст лархIуну диркIшиву, 12 хIухчищал данди увксса ттатта цувагу райондалул азарханалийн агьарчагу, ми циняв хIухчалтгу азарханалийн багьшиву.
КIяласса чIиригу бусса, оьвхъусса, бюхттулсса къужа икIайва ттул ттатта. КкурчIав кIяла баркьутраву щяивкIсса чIумал, цувагу ца исвагьину чIалан икIайва, чIиригу кIяласса бухьувкун, магьравасса ттатта куна.
Журат дусса, авкьатсса къужрал ккурчIа бувцIуну бикIайва. Учин ччиссагу мура, шяравух лагма буккарча, чансса дакъар ххаллилсса дарвазартту бусса, лавгзаманнул архитектуралул гьайкаллан ккалли дуван бучIисса къатри.
ДакIнихтуну ххари хъанай бура вай гъинтнил гъилисса гьантрай буттал шяраву, къатри дакьин дуллай, цIусса дуллай, зузалтрал бригадартту зий бушиврий. Нара дачин дурсса Телеграм-каналданий дукIувагу чивчуссия, уттигу тикрал буванна: буттал шяравусса бург-кьютIилттул кьутI-шутI макьан кунма, малхIанну баллан бикIай вичIан. Дира-дикIувча яла къуркъамур, дюкъярхъумур макьан. Оркестрданул симфониялул багьассар цIуоьрмулул макьан!
Дюхъаннав вил цIа-кьини цIуницIа, цIанихсса ЦIувкIул!
ПатIимат Рамазанова
