Ларгсса нюжмардий МахIачкъалалий Аь. Тахо-Годил цIанийсса Национальный музейраву хьунни Дагъусттан Республикалул ва Аьрасатнал Федерациялул лайкь хьусса художник, ГьунчIукьатIрал шяравасса Альберт Хаджаевлул дирхьусса суратирттал альбомрал презентация. Ва хьунни ларгсса шинал аьпалухьхьун лавгсса художник дакIнин утлатисса мажлисгу.

БатIаву дачин дурну бия П. ХIамзатовал цIанийсса Дагъусттаннал изобразительный искусствардал музейрал директор СалихIат ХIамзатова. Художникнал душ, ва проектрал автор, Мадина Хаджаевал бавтIминнащал кIидарчIунни буттаясса дакIнинбичавуртту, бувсунни ва альбомрал дунияллийн букканнин бивтсса ххуллуя, барчаллагь увкунни ва бигьа дакъасса даву щаллу дуван кумаг бувминнахь, хаснува мудан цила чIарав ивкIсса, ва давриву захIматрал хъунмасса бутIа бивхьусса цила ласнахь ва ниттихь, мукунма СалихIат ХIамзатовахь.
Ихтилатру бунни Аь. Тахо-Годил цIанийсса Национальный музейрал генеральный директорнал хъиривмур Муслимат Халимбековал, вава музейрал культурно-выставочный центрданул каялувчи Жамиля Дагировал, Дагъусттаннал Художниктурал союзрал председатель Кьурбанаьли МахIаммадовлул, Дагъусттаннал Чичултрал союзрал председатель Марина АхIмадова-Колюбакинал, Дагъусттан Республикалул искусствардал лайкь хьусса ишккакку Тарият Къапиевал, Дагъусттаннал халкьуннал артист Хан Башировлул, ОьрчIал художествалул школалул директор Гульнара Мамашевал, ГьунчIукьатIрал шяраваллил жяматийсса советрал председатель ХIажибутта ХIусайновлул.
Муслимат Халимбековал барчаллагь увкунни художникнал щащар Нина Васильевнахь, душваврахь Фатимахь ва Мадинахь, ласнал ва буттал аьпа кьадрулий ябуллалаврихлу, Мадинахь ва бигьа дакъасса даву бакIрайн дуккан дуван бувсса захIматрахлу, кIицI лавгунни цивппа пахрулий бушиву цалва музейравугу ванал дирхьусса суратру душиврия.
СалихIат ХIамзатовал дакIнин дирчунни 2018-ку шинал цалва музейраву художникнал юбилейрал выставка дуллай бивкIсса чIунну. Гихунмайсса цилва ихтилатраву ванил кIицI лавгунни Альберт Хаджаевлул 1972-ку шинал къуртал бувшиву Ттуплисуллал паччахIлугърал художестварттал академия, махъунай Дагъусттаннайн зана хьуну, зун ивкIшиву М.-А. Жамаллул цIанийсса Дагъусттаннал Художествалул училищалуву, шиву ваначIа дуклай бивкIминная хьушиву цIа дурксса художниктал ва дизайнертал.
Ванал дарс дирхьусса Гульнара Мамашевалмур ихтилатгу бия асар хьунсса. Цила педагогная, наставникная буслай, Гульнара Нажмуттиновнал чIурчIав дуруна цуппа Художествалул школалий зузисса 32-гу шинай оьрмулувугу, творчествалувугу бучIину ляхълай бушиврий Альберт Захаровичлул лахьхьин бувмур, бувсмур, «ванал бувгьу­сса гьанна гьарца шинал личIи-личIисса журардай ххяхлай бушиврий».
Ва кьини шикку хьусса гьарцагу инсаннан Мадина Хаджаевал бахшишран буллуна цIуну дунияллийн бувксса альбом. Ва бур 200-ннийн дирсса чIапIив дусса, художникнал дирхьусса 50-нния лирчусса суратру дусса жуж. Ванил мужаллатрай дур художникнал суратирттавасса ца яла яргмунин ккаллисса «Бархъарадуш» сурат. Альбомрал цалчинсса лажинтирттай бур Альберт Хаджаевлул творчествалия искусствовед, Аьрасатнал Художествалул академиялул член-корреспондент Виталий Пацюковлул чивчусса хьхьичIмахъ. Мукунма СалихIат ХIамзатовал чивчумургу. Луттиравусса чичрурду дуллуну дур кIива мазрай – оьрус ва ингилис.
«Луттирал графика» тIимур разделданий дур художникнал чичултрал ва шаэртурал луттирдацIун дирхьусса суратру, мукунссарив хьуну бур 200-нния ливчусса луттирду. Ахирданий дур художникнал оьрмулул личIи-личIисса шиннардий гъан-маччаминнащал ва даврил уртакьтуращал рирщусса суратру. Ва альбомраха зий Мадина Хаджаевал ва ванил лас Илья Петренкол 5 шин хьуну дур. Альбом бивщуну бур Москавлив.
Ва кьини ихтилатру буллалими ца зумату кунма кIицI лаглай бия Альберт Захаровичлул художник ва педагог хIисаврай республикалул ва билаятрал искусствалуву кьабивтсса хъинну куртIсса шаттирду.

Выставка

Презентациялия махъ художникнал аьпалунсса батIаву лахъи ларгунни П. ХIамзатовал цIанийсса Дагъусттаннал изобразительный искусствардал музейраву. Шикку хьунни Альберт Хаджаевлул дирхьусса суратирттал выставка. Ваний дия художникнал личIи-личIисса шиннардий дирхьусса суратру.
Выставкалийн бувкIминнавух бия КIямашрал шяравасса Мариян Кьурбановагу (МахIаммадовагу). Цилва оьрмулуву цалчин Альберт Хаджаев ккавксса чIумал, Марияннун диркIун дур 11 шин. Ва ялапар хъанай бивкIун бур ГьунчIукьатIув. Га диркIун дур 1973-ку шин. Шяравун увкIсса художникнан щинав нанисса чIивисса душ итталун багьну, мунил шакил рирщуну, махъ муния сурат дирхьуну дур. Шичча дайдирхьуну дур вайннал дусшиву. Ванияр махъ 50-ллийсса шиннардий куннан кув къаккаккарчангу, га чIумалсса Союзрай чIявуми инсантурал кунна, байраннай куннал кунначIан открыткартту гьан дувайсса диркIун дур.
Альберт Хаджаевлул дирхьусса суратирттаву итталун къадагьансса, дакIний къаличIансса сурат дакъар. Мукунна асар биян буллалисса дур ванал дирхьусса цалва душнил Фатимал суратгу. Шикку душницIун художникнал дирхьуну дур чIивисса Фатимал дирхьусса суратругу, ва тIуркIу тIий бивкIсса игрушкардугу. Фатимал буслай, суратрайсса игрушкардава цIананин ливчIун бур анжагъ цуша.
ДакIний личIансса, цимивагу асар хIала бувхсса, дакIнихтунусса хьунни художникнал аьпалунсса ва кьинисса кIирагу батIаву. Ванал аьпа ябуллай бур щащар Нина Васильевна, душру Фатима ва Мадина, куявтал МухIаммад ва Илья, вайннал наслу, художникнащал ва ванал творчествалущал чансса бунугу кIулну бивкIми. Нина Васильевна Хаджаева – захIматрал ветеран, Дагъусттан Республикалул лайкь хьусса учитель, ляличIисса гьунар бусса оьрчIансса М. Къажлаевлул цIанийсса Республикалул искусствардал школалий изобразительный искусствардал отделданий хьхьичIунсса преподавательну зий бур. Фатима – Аьрасатнал Федерациялул кIулшиву дулаврил бусравсса зузала, чил мазурдил учительтурал ассоциациялул член. МухIаммад – ишбажаранчи. Мадина – Чачаннал Республикалул лайкь хьусса артистка, 2022-ку шиная шинмай – Чачаннал Республикалул симфонический оркестрданул артист (ваниннин ва бивкIссар Дагъусттан Республикалул Опералул ва балетрал театрданучIасса симфонический оркестрданул артистну). Ванил лас Илья Петренко – Чачаннал Республикалул ПаччахIлугърал симфонический оркестрданул ва Дагъусттан Республикалул ПаччахIлугърал Опералул ва балетрал театрданул симфонический оркестрданул дирижер, Чачаннал Республикалул Халкьуннал артист, Ингушетиянал Республикалул лайкь хьусса артист, Аьрасатнал Федерациялул ХIукуматрал культуралул областьравусса премиялул лауреат.
Бадрижамал Аьлиева