Гьарца шинал июльданул 26-нний Дагъусттаннал халкьуннал дувайссар региондалул тарихравусса агьамсса иширан хасъсса – ДР-лул Конституция кьамул баврицIунсса шадлугъру.
Конституциялул ккаккан бувссар инсан ва ванал ихтиярду хъанай душиву лавайсса даражалул ххазинардуну, ми дуруччаву – паччахIлугърал бурж бушиву. Ва документрал хъуннамур мяъна хъанай дур республикалул циняв миллатру архIалсса бушиву чIалачIи баву ва миллатирттал культура, традицияртту, мазру ябаву, буруччаву.
Дагъусттан ккаллиссар АьФ-лул ца бутIун ва хъанахъиссар цасса ихтиярдал гьанулийсса республика ва циняв дагъусттанлувтурал аьмсса Ватан.
1994 шинал Конституция кьамул баву хьуссар жула тарихрал жаваблувсса ятIапрай Дагъусттаннал жяматру цачIун бансса агьамсса сававну, тай захIматсса шартIирдаву бювхъуссар Дагъусттаннал аьрщарай дуруччин паракьатшиву ва аслахIшиву. Чан-чанну, тIий Дагъусттаннай архIалну, цанницIун ца даркьуну хьхьичIуннай дарчуссар федерал ва республикалул законну.Гьай-гьай, Конституциялийн учин къашайссар аьй, тIал дакъасса акт бур куну, мунил положенияртту бахханаххи хъанан бюхъайссар, жяматийсса арарду даххана хъанахъавугу хIисаврайн ларсун. Конституциялуву ка лаян къабучIимину личIлачIиссар ДР-лул Конституция сакин буллалисса чIумал гьануну ларсун диркIсса базалул принципру.
Дагъусттаннал ХIукуматрал баян бунни итникьини
1995 шинал июльданул 18-нний бувксса Дагъусттан Республикалул ПаччахIлугърал Советрал 138-мур «Об объявлении национального праздника Республики Дагестан – Дня Конституции Республики Дагестан нерабочим днем» тIисса ХIукмулийн бувну, Дагъусттан Республикалул Конституциялул Кьини (июльданул 26) баян буллалиссар къазузи кьинину.
2025 шинал Дагъусттан Республикалул Конституциялул байран кьини тIайла дацIлай дур ххуллункьинилийн.
АьФ-лул ЗахIматрал кодексрайн бувну, зукъазисса байран кьини бигьалагай кьинилийн тIайла дацIлай духьурча, бигьалагай кьини ласайссар байран кьинилия махъсса зузи кьинилийн.Мунияту, июльданул 26-ннил ххуллункьини ласласиссар июльданул 28-ннил итникьинилийн.
ХIадур бувссар
ХI. Аьдиловлул
