ХIурмат бусса буккулт! Вай жул маслихIатру къюкIлил-сосудирттал лахъи ларгсса азарду думиннанссар: артериал гипертензия, къюкIлил ишемиялул азар ва цаймигу. Вай азарду хирургиялул кумаграйну хъин даву диялну хьхьичIуннай хьуну дунугу, чара бакъа чIумуя-чIумуйн даруртту хIачIлан аьркинну бикIай.
Гъи дучIайхту, зуватусса чIявуминнан Лаккуйнмай биян ччан бикIай, гьавалийн буккан, зунттал ххуллурдайх занан. Гьавалийсса заназин гьакссагу ххуйри!
Жунма кIулли Лакрал ва Ккуллал районну 1700-3500 метралул лахъну душиву хьхьирияр. Арнил кIанттайсса ва зунттал кIанттайсса гьавалул тагьар личIиссар, атмосферное давление, кислород личIи-личIиссар. КъюкIлил инжитсса инсантал, аьдат бакъа, чурххайн цахъис гуж бутарча, хъиннува инжит хьун бюхъайссар, хIатта цаппара гьантри бан бувкIун бухьурчагума. ЖучIан азарханалийн ччя-ччяни багьай, райондалийн бучIайхту, инжит хьусса ­инса­нтал. ЦIухху-бусу бувкун, ялун личай ми чIун-чIумуй хIачIлан аьркинсса даруртту кьабивтун, къахIачIлай бивкIшиву.
Мунияту, зунттавун нанийни, хъамамабитари зущалва аьркинсса даруртту ласун ва бувкIсса кьинива ми хIачIлай байбихьин. Зунттал кIанттайн нажагь лага-бучIайминнан, аьдат хьуннин, хъиннува лахъисса ххуллурду битлан аьркин бакъассар. Бюхъавай шаппалличIан гъанну заназияра, чурххайн гуж къабагьанну.
Агар азарханалийн, хIакин­турайн буккансса иш багьарчагу тIий, зущалва лалусияра медициналул документру, азарханардаясса выпискарду, хIакинтурал заключениярду. Миннуйн чул бивщуну, жуща зунма чIумуй багьайсса медициналул кумаг буван хьуншиврул.
Жу зун цIакьсса цIуллушивугу, тIааьнсса аьрххи-ххуллурдугу чIа тIий буру, хаснува жула Лакку билаятрай рахIатну бигьалагавансса!

Лакрал райондалул
азарханалул администрация