Р. ХIамзатовлул цIанийсса Миллатрал библиотекалуву лавай­сса даражалий хьунни шаэр, публицист, Аьрасатнал Чичултрал союзрал член ХIадис ХIадисовлул «Жулла ччаврил дуниял» тIисса ва педагогикалул элмурдал кандидат Ямудин Таибовлул «Лакку мазрал дунияллий» («В мире лакского языка») тIисса луттирдал презентация.

Шикку гьуртту хьунни шаэртал, чичулт, жяматийсса ишккаккулт, школардал учительтал ва дуклаки оьрчIру, кIиягу авторнал дустал, даврил уртакьтал, гъан-маччами.
Дачин дурну ия мероприятие Дагъусттаннал Чичултрал союзрал лакрал секциялул хъунама Супиян Оьмаров.
ХIадис ХIадисовлул оьрмулия ва творчествалия бусласи­сса гьарта-гьарзасса ихтилат бунни философиялул ва филологиялул элмурдал доктор Хизри Илиясовлул.
ХIадисхъал ХIадис увну ур Рутуллал райондалийсса Дюкъуллал шяраву. Лув ЧIатлухъиял дянивмур даражалул школагу къуртал бувну, 1979-ку шинал увххун ур Дагъусттаннал университетрал тарихрал факультетрайн.

ЧIярусса шиннардий ва зий ур школалий, тарихрал ва лакку мазрал дарсру дихьлай. ОьрчIру тарбия баврил ва ми­ннан кIулшивуртту дулаврил ххуллий бивхьусса захIматрахлу ва хьхьичIуннайшивурттахлу ва лайкь хьуну ур «Дагъусттаннал халкьуннан кIулшивуртту дулаврил отличник» ва «Аьрасатнал аьмсса кIулшивуртту дулаврил лайкь хьусса зузала» тIисса бусравсса цIардан, ХIурматрал грамотарттан ва Барчаллагьрал чагъардан. ХIадислул итабавкьуну бур 7 лу: «Лакку улклул зуманицI», «Ттуруллаяр лахъну», «Ттул дакI Лаккуйри ду­сса», «Дюкъул», «Жулла ччаврил дуниял», «Чарттал бусала», «Ччувччусса хияллу».
«Жулла ччаврил дуниял» тIисса луттираву дур махъсса шиннардий шаэрнал чирчусса назмурду. ХIадислул творчествалуву хъунмур кIану бугьлай бур тIабиаьтрахасса ва эшкьи-ччаврихасса лирикалул. Чан­сса бакъар граждан лирикалул шеърирдугу. Ванал тарихрал дарсру Ватандалухсса ччаврил видурцIусса чувшиврул дарсру дур.
ХIадис ур шяраваллил оьрму щирикIин буллалисса, гьарица чулухунмай гьунар бусса ва чялишсса инсан, хъинсса давурттал сиптачи ва сакиншинначи. Ва ур тарихчи-этнограф. ХIадислул сипталий Дюкъуллал школалий тIивтIуну бур буттал улча лахьхьаврил музей. Тарихрал учитель ва шаэр хIисаврай ва ахттар буллай ур Буттал кIанттул тарих. ХIадис ур шяраваллил аксакал, шяравусса мизитрал имам.

ХIадислуя ихтилат буллали­сса сайки гьарца инсаннал кIицI лагайва, ва цува дахьа цIана ккаклай унугу, ваная бавшиву, ванал творчество нукIура кIулшиву, бишлай бия мунин лавайсса кьимат.
ДИРО-лул проректор, профессор АхIмад Кьурбановлул увкусса куццуй, инсаннаясса нур хьхьичI дачайссар. Мукун кунма, ХIадислуясса чанигу цаярва хьхьичI бивну бур инсантурачIан.

Явмудин Таибовлул, руту­ллал миллатрал арс унугу, итабавкьуну бур Дагъустт­аннал цаппара миллатирттал мазурдийсса, ниттил мазрал дарсирдай, классрал кьатIувсса давриву, конкурсирттай ишла бан бучIи лякъинсса, жула тарихрацIун, географиялуцIун, багьу-бизулуцIун бавхIусса, кроссвордру, чайнвордру, ребусру, учалартту цачIун був­сса жуж. Ва бур гьарица темалун хасъсса суратирттал чIюлу бувсса, оьрчIавун лакку мазрах гъира бутансса ва лакку мазрал учительтуран кумагчину хьунсса ххаллилсса лу. КутIану бувсун бур лакрал вирттаврая, цIанихсса аьлимтурая, спортсментурая, политиктурая ва жяматийсса ишккаккултрая.
Явмудин Таибовлул къуртал бувну бур Дагъусттаннал педуниверситетрал географиялул факультет ва Правалул ва финансирттал институтрал юридий факультет. Ва ур Дагъусттаннал лайкь хьусса учитель, Аьрасатнал аьмсса кIулшивуртту дулаврил ХIурматлувсса зузала. ЦIанасса чIумал ва ур Рутуллал 1-мур школалул директорну.
ХIадислуя ва Явмудиннуя бусласисса, вайннал луттирдан кьимат бишлашисса ихтилатру бунни кIивагу луттирал презентациялул сиптачитал ва сакиншинначитал хьусса «Ябувара жулва миллат» тIисса ккурандалул вакилтал Валида Исякьовал, Басират Шамххаловал, Рамазан ХIасановлул, Краснодардая увкIсса, мудангу лакрал мероприятиярттай гьуртту шай­сса, Вихьуллал шяравасса Аьли МахIаммадовлул, профессор АхIмад Кьурбановлул, шаэр Алексей ХIажиевлул, отставкалийсса полковник Велихан Аьлибековлул, лакку мазрал учитель ПатIимат Аьлиевал ва м.ц. Ихтилат къуртал буллай, Валидал бувккунни ЧIяйннал шяравасса шаэр Арсен Аьбдуллаевлул ХIадислун хас бувну чивчу­сса шеъри.
Лакрал райондалул бакIчинал хъиривчу Макьсуд Къушиевлул, райондалул бакIчи Юсуп МахIаммадовлул цIаниясса барча бавугу дурккуну, кIиягу авторнан Барчаллагьрал чагъарду буллунни.
Ихтилатирттал лях-карах Каспийскаллал 8-мур, МахIачкъалаллал 26-мур ва 27-мур школардал дуклаки оьрчIал (вайннавух ХIадислул оьрчIал оьрчIругу бия) бувккунни ХIадис ХIадисовлул шеърирду.
Мероприятие чIюлу дунни ЦIаххай МахIаммадовлул, Гъазихан Рамазановлул, Садаят МахIаммадовал, Михаил ХIашимовлул балайрдал.
ХIадис ХIадисовлул ва Явмудин Таибовлул барчаллагь увкунни цала кьини хъун дан, чIарав бацIан бувкIсса цинявннахь.
«Ябувара жулва миллат» ккурандалул чулуха кIиягу авторнангу, вай луттирду дунияллийн буккан бан кумаг був­сса Хизри Илиясовлунгу дунни бахшишру.

Андриана Аьбдуллаева