Цала оьрмулул чIяруми шинну, сайки 40 шин, МахIачкъалаллал муххал ххуллий личIи-личIисса жаваблувсса къуллугъирттай зий гьан дурсса МахIаммад Аьбдуллаевлул хIурмат хъунмасса бур идаралул хъуниминнал ва даврил уртакьтурал дянив. Лавайсса даражалул пишакар МахIаммадлул опытгу, кIулшивурттугу, насихIатругу хIакьину бучIи ляхълай бур жагьилсса зузалтран.
Увну ур МахIаммад Дарбантуллал райондалийсса Мамедкъала поселокрай, Ккацраннал шяравасса Аьбдуллул ва 1-мур ЦIувкIратусса Сагъдижатлул кулпатраву. Дарбантлив муххал ххуллул школа-интернатрай (№6) мяйва классгу бувккуну, 1980-ку шинал МахIаммад увххун ур Ростоврайсса Муххал ххуллул техникумравун. Му къуртал бувну махъ, шанна шинай Аьралуннал ва хьхьирил флотрай къуллугъ буллайгу ивкIун, увххун ур зун Избербаш станциялийсса ххуллул монтерну. КIира шинава ивтун ур Мамедкъала станциялийсса ххуллул бригадирну.
Ва къуллугърай МахIаммадлул 8 шин дурну дур. Яла ва ивтун ур ххуллул усттарну. Шикку зий унува, цала кIулшивуртту куртI даву, магьиршиву гьаз даву мурадрай, увххун ур дуклан РГУПС-вун (Ростовский государственный университет путей сообщения). Утти ва хьуну ур лавайсса даражалул инженер-путеец. 2006-ку шинал опыт бусса, даврил сант кIулсса, жаваблувсса МахIаммадлуйн тапшур бувну бур хъунмасса, 70-хъул километралул лахъишиврийсса, кIива ххуллу бусса участокрал (Избербаш – Дагестанские Огни) хъунаманал къуллугъ. Гьай-гьай, къабигьассар укун хъунмасса ххуллийх заназисса поездру мюхчан бан. МахIаммад личIлулну ацIайсса ивкIун ур цала биялдарайсса ххуллул къаралданий.
МахIаммадлул ва пишалухсса ччаву оьтту-ттурчIавухра ирсирай дуллусса дур. Ванал ниттил ппу МахIаммад цила чIумал зий ивкIун ур ххуллурдал лагма уккуну, нину 35 шинай диркIун дур Дарбантуллал манзилданийсса ххуллул монтерну, ппу – хасъсса вагоннал проводникну.
ДакIнил лавсъсса пишалий зузисса инсаннал даврил ккаккиярттугу хьхьичIуннайсса дикIай. Цала даву ххуйну кIулшивруцIун, МахIаммад ур цаярагу, цайминнаягу тIалавшинна дусса, низам ххирасса, цала махъ бацIан байсса инсан.
МукьцIалла шинал лажиндарай муххал ххуллул даврий зий бивхьусса захIматрахлу ва ххуйсса ккаккиярттахлу МахIаммад лайкь хьуну ур «Муххал ххуллул хIурматлувсса зузала» тIисса лишандалун, Аьрасатнал МПС-лул (Министерство путей сообщения) ва Ухссавнил Ккавкказуллал муххал ххуллул хъунаманал чулухасса цIа кусса ссятирдан. Ххуллул министрнал чулухасса ссят ванан дуллуну дур Москавлив, цува делегатну лавгсса Щалагу Аьрасатнал муххал ххуллул зузалтрал съездрай. Ми дакъассагу, ванал дур чIярусса ХIурматрал грамотартту ва Барчаллагьрал чагъарду.
ЦIанасса чIумалгу оьрмулул 61 шинавусса МахIаммад участокрал хъунаману зий ур. Гьар мудан куна, лавайсса даражалий цала къуллугърал буржру бартбигьлай, махъа наниминнан эбратну ур.
Андриана Аьбдуллаева
