Июльданул 1-нний Дагъусттаннал бакIчи Сергей Меликовлул дунни властьрал органнал каялувчитуращалсса батIаву, муний ххал бивгьунни республикалул социал-экономика лядуккан даврин агьамшиву дусса масъалартту.
Кадрардал хIакъираву
Цалчин ярглий Сергей Меликовлул бувсунни Дагъусттаннай махъсса ппурттуву хьусса кадрардал хIакъиравусса дахханашивурттая.
Дагъусттаннал юстициялул министрнал къуллугърай цIакь унни Мусттапа Генжеханов.
Дагъусттаннал ПаччахIлугърал секретарь МахIаммад-Султан МахIаммадов мурахас увунни къуллугъраща.
Жамбулат Салавов ивтунни МахIачкъала шагьрулул бакIчинал ихтиярду чIумуйну бартдигьлагьиману.
Запир ХIасанов ивтунни Хайдакьуллал райондалул бакIчинал буржру чIумуйну бартбигьлагьиману.
Дагъусттаннал транспортрал министрнал буржру чIумуйну бартбигьлагьиману ивтунни МахIаммад ТIагьиров.
Сергей Касьянов мурахас унни Дагъусттаннал ПаччахIлугърал тIювалул инспекциялул каялувчинал къуллугъраща.
Пенсиялийн уккаву сававну къуллугърая мурахас увунни Дагъусттаннал Мюхчаншиврул Советрал секретарь Ссапарбаг ХIамидов.
Университет
ххал буллан най бур
Дагъусттаннал паччахIлугърал аграр университетрал давуртту ххал дувантIий бур. Республикалул бакIчинал тIимунийну, вузрал каялувчинахь цимилагу увкуну бивкIун бур университетрава итабакьлакьисса пишакартурал кIулшиву хьхьарасса душиврул хIакъираву.
«Аграр университетрал пишакартал хIадур бавриву лапва чIивисса кIану бугьлай бур. Иширайну сайки циняв предприятиярттай зий бур цайми регионнаясса, ягу хIатта цайми билаятирттаяссагума пишакартал. Дагъусттаннал экономикалун агьаммурну хъанахъисса бутIух мукссара баччибакъасса буругаву дикIан къабучIиссар.
Мунийн бувну, на тапшур бував ххал дуван ва университетрал дарсру дишаврил, дуккаврил тагьар ва бартбигьин жул АПК-лул Советрал хIукму», – увкунни Сергей Меликовлул.
Дуккаврил тагьар ххал даврил хIасиллах бурувгун, лякъинтIий бур балжисса чаранну.
Инсантурал
лабизавуртту
Инсантурал лабизавурттах властьрал органнал цукунсса къулагъас дуллай буссарив бувсунни ДР-лул БакIчинал ва ХIукуматрал администрациялул каялувчи МахIач Оьмаровлул. Ванал тIимунийну, агьалинал хъуними буруккинну бусса бур чани лещан баврицIун, щин дакъашивруцIунсса, ххуллурду бакьин баврицIунсса ва цIинцI цила чIумал къадукьлакьаврицIунсса.
АПК-лун кумаг баву
БатIаврий ДР-лул вице-премьер Нариман АьбдулмутIалибовлул бувсунни региондалул агропромышленностьрал комплексраву субсидияртту ишла баврил мюнпатрал хIакъираву. Ванал тIимунийну, региондалул ВРП-луву 20% шяраваллил хозяйствалул бакIлахърулулсса хъанай бур.
«Гьашину республикалун федерал бюджетрава шяраваллил хозяйствалун итадакьин ккаккан дурну дур 3,5 млрд къурушраяргу чIярусса арцу, ягу 2024 шиналнияр 678 млн ххишалану», – увкунни вице-премьернал.
Нариман АьбдулмутIалибовлул гьартану бувсунни къюмайтIутIи бугьайминнансса кумаграя. Ванал тIимунийну, 2025 шинал ва бутIунсса кумагран ккаккан дурну дур 1 млрд къуруш.
«ПМЭФ-2025» форумрал хIасиллу
Дагъусттаннал экономикалул министр ХIажи Султановлул дунни Дагъусттан Санкт-Петербургуллал экономикалул форумрай гьуртту шаврил хIасиллу. ЛичIинура агьамминнун ккаллину дур ДР-лул, АьФ-лул Министерствалул ва Аьрасатнал Футболданул союзрал дянив чирчусса рязишиврул кьутIи. Ва документрай ккаккан бувну бур региондалий футболданул инфраструктура лядуккан дуван, оьрчIал спортран кумаг буван, региондалий пишакартал хIадур буван. Агьамсса хIасиллан ккаллину дур ялагу: «Татнефть» ПАО-лущалсса рязишиврул кьутIи, «ОЗОН» компаниялущалсса кьутIи ва цаймигу. Миннуха цIана зий бур. КьутIирду бартдигьаврия хъунмасса кумаг хьунтIий бур региондалул социал-экономика лядуккан даврин.
Регионнал
ялапарлувтуращалсса дахIаву
ДР-лул БакIчинал ва ХIукуматрал администрациялул каялувчинал хъиривчу – ДР-лул БакIчинал Информациялул политикалул ва пресс-службалул управлениялул хъунама Рашид Акавовлул бувсунни Дагъусттаннал властьрал органнал цукун жаваб дулайссарив ялапарлувтурал официалсса лабизавурттахьхьун. Ванал бусаврийну, гьашину 6 зурул мутталий ва идаралийн дуркIун дур 6260 лабизаву. Яла агьамминнун ккаллину бур социал дузалшиндарал, къатта бансса аьрщарал участокру дулаврил, мюхчаншиву щаллу даврил ва аьдлу-низам дуруччаврил масъалартту.
Рашид Акавовлул тIимунийну, аьрзарду чичлай бусса бур тIайланма ДР-лул БакIчинал ва ХIукуматрал администрациялийн, ми масъалартту дузал буван аьркинсса ялаваймур даражалул идарарттайн чичин кIанай. Гьашину 6 зурул мутталий дуркIсса 6260 лабизаврива 79% аьрзардал бувкIун бур властьрал органнал ведомствалийн.
БатIаврий ххал бивгьунни цаймигу масъалартту.
ХIадур бувссар ХI.Аьдиловлул
