Июньдалул 21-нний Ккуллал райондалийсса Ваччиял шяраву кIицI ларгунни Аьпалул ва хажалатрал кьини.

Му кьинилуцIун дархIусса митинг хьунни Хъун дяъвилия зана къавхьуминнал аьпалунсса гьайкалданучIа. Шикку гьуртту хьунни райондалул бакI дургьуми, шяраваллал бакIчитал, идарарттал хъуними ва зузалт, учительтал ва дуклаки оьрчIру.
БавтIминнал хьхьичI махъ лавхъунни Ккуллал райондалул бакIчи Шамил Рамазановлул.
– ХIакьину щала Аьрасатнаву кIицI лаглай бур жула тарихраву ца яла пашмансса кьини – Совет билаятрайн лавмартну душман ххявхсса. Ва лухIи кьинину хъанахъиссар жула райондалул агьалинангу. Никирая никирайн яла къагьантIиссар та дяъвилул къювугу, асардугу. Райондалий бакъахьунссар цавагу кулпат Хъун дяъвилул щавщи къабивсса. ЧIивисса лакрал миллатрава ххюннал ларсун дур Виричунал цIа. ЧIявусса лайкь хьуну бур орден-медаллан. Ххувшаву ласун хъунмасса кIану бувгьуссар, дяъвилул цIу къизгъинний талай бивкIминнал бакъа, захIматрал фронтрай гьурттушинна дурминналгу. Жува буржлувссару жула тархъаншиврул цIаний жанну харж дурминнал аьпа абад буллан, – увкунни Шамил Рамазановлул.
Хъирив баян бунни дяъвилий жанну дуллуминнал аьпалунсса минутIрайсса пахъ багьаву. Дяъвилия зана къавхьуминнал гьайкалдануцI дирхьунни тIутIив.