Алекси Аьбдуллаев
Дагъусттан, бая ттул чIу!
Ниттил хъазам чIивитIун
НакIлил буцIайсса кунма,
Дагъусттан, вихсса ччаврил
БувцIуну бур ттул яру!
Щялмахъ буслай ухьурча,
Щяв зизиннав кIивагу,
Тирхханну дусса кьини
Къаккакканнав царагу!
Чичлай виха «рагъанну»,
Къадував на хъус-кьини,
МухIлу чIурусса лякьлун
Гьа шай къяс бансса ини!
Шярлугу, булбул хъанай,
Виха тIун бикIай балай,
Заэвну лархъсса кIалай –
Хъунма къавтIину чIалай!
Заргалнал муси кунна,
Вил цIарай дакI дарцIан дав,
Маэшат дакIний буну
Ца махъ вия къачичав!
Ниттил хъазам чIивитIун
НакIлил буцIайсса кунма,
Дагъусттан, вихсса ччаврил
БувцIуну бур ттул яру!
Щялмахъ буслай ухьурча,
Щяв зизиннав кIивагу,
Тирхханну дусса кьини
Къаккакканнав царагу!
Къаракъум ва Къизилкъум
Къаракъум ва Къизилкъум,
Дазу-зума дакъасса,
ДакIний урив Алекси,
Заллу ва зал акъасса?
Бухарнал гьинтлул кунма,
Зуйх биялсса бав ччамар…
Цири дарвишнал оьрму –
Агьаннин байсса ссапар?
Навоил балайрдайну
Къалахьхьав на ва оьрму,
Памма батIулт ва хIухчалт,
Хъинну лахьхьав зул элму!
Ччаву дав узбакIдушних,
ЦIараяргу кIирисса,
ЛухIисса яруннава
ЦIупарду личлачисса!
Ччамаргу бав ччиссаксса
Къундалул авлахъирттайх.
Ккавккуна ттун бюрнигу,
Баргъ лавхсса цила хъирттайх!
Заннал дирхьусса кIили
Дуссар варанттул бянив,
Лавгссара хIухчил къушлийн,
ЩяивкIун кIиллул дянив!
Бувкуссар кIюла ххункIгу,
Тайннал «бешбармакь» учай,
Ттул дакIния къалагай
УзбакIнал щюллисса чяй.
Къаракъум ва Къизилкъум,
Дазу-зума дакъасса,
ДакIний урив Алекси,
Заллу ва зал акъасса?
Дагъусттан, УзбакIисттан!
Зул дусшиврул ламура!
Зуйн цIан дагьан къаритан,
Мудан лавхъсса ламара!
ЦIу лаганна
На навагу цIу лаганна,
Дайдишайхту цIусса шин,
Лавгмур гьантта къабитанна
БучIанмуниха лащан!
Щин руртIуну, лещан банна
Дух дардирдал чирахъру,
ТIуркIутIи банна мурчащал
Шадшивурттал байрахъру!
ЦIусса гьухъа-хIажак кунна,
ЦIушин ттуйхра лахханна,
Умудрая щарщун хъару,
На цIурттачIан лехханна!
ЦIу лаганна! ЦIу лаганна!
Виватугу, ялттугу!
ЦIусса ххару личин банна
Ттула дакIнил оьттува!
Бартукь
Буттарссил буллуна
Ттун бартукь бухсса,
Аьвзалзаманалул
Кьанкь цивурасса.
Бия га гъилисса,
Пачкъатта кунма,
МурцIувгу бацIайва,
Аькьлукар кунма!
Къааьркинъя виргъан,
Шану-кIаралу,
Гьая ттун га бартукь
Ялун, бакIралун.
Ганил щурщулийну
Магьри бусайва,
Буттарссил кунма, ттухь
МаслихIат байва…
ДиркIунни буттарссу,
ЛивчIунни магьа,
Бартукьрив бур шаппа,
Аькьлукар кунма.
Ялун га бутара,
Аьвкъусса чIумал –
Сагъ хьуну, буттарссу
Зана шай ттучIан!
Ссаха зийри чIун ларгсса?
Жами хханссар ттул пукьа,
Мурчал гургутIи бувсса,
Бурандалул гужшиву,
Аьрщи-ссав хIала дурсса!
Мурчаяр дур ялттусса
ДакIниву гьалакшиву:
Ссаха зийри чIун ларгсса?
Суал, жуав къакIулсса.
Мяйжаннугу, щийхривав
БачIи оьрму бавчIусса,
НахIакьсса ччаврийхривав,
Тирххандарайн къадурксса?
Ягу, дустал, зуйхривав,
На хIанттичIа гьаз айсса,
Иш багьсса чIумал, чIарав
АцIанма къалявкъусса?
Ссаха зийри чIун ларгсса?
Хъинну кIусса бур суал,
Бюхъай га ларгун дикIан,
ДурчIин ччай ва дуниял!
Бавккусса мяр кунмасса
Суал бур ва баласса,
Дула, Зал, ттухьхьун кьудрат
Мяр тIайла бацIан бансса!
Ччучлай ура балайрду
КъавтIий бур някIсса лама,
Ччучлай ура балайрду,
Аьщуйн къавщусса зайрду,
Ягу мукъурттил хьама.
Бичлай ура цIаравун
На ттула лякьлул оьрчIру,
Бичай залуннал мукун
Щинавун гужлул карчIру!
Ччучлай ура балайрду,
Лехлай бур мусил найрду,
ЦIуртти кунна, чаннасса
Дур щугълурдал кIалайрду!
Лархъ цIарайн пув тIий уна,
ЦIими хьунну вав-шав тIий
Дур ттул дакI, курчIу кунна,
КьурукIинттул барцI кунна.
Къавихра на балайрдайн
ЦIаравун бичлачисса,
Вихра на так ца ххуттайн
ЦIарава личинтIисса!
Апаннинал гьаттай
Хияллал ххюрхху увну,
Лавгра АпанниначIан,
Увччуну ур ва зунттуй –
Лермонтовлул гьаттачIа.
СсанчIав дакъасса уртту
Чаривагума личай,
Я ххари бансса тIутIи
Ччи-ччинийгу къалякъай.
Апаннинал гьаттахгу
Ургансса акъар цукIуй,
Ххярххун дур вяйлив уртту
Пятигорскаллал бакIуй.
Чарий дурсса суратгу
Пар-партIи дурну марцI дав,
Буттал тавхана кунна,
Лазиларкьуссия гьав…
Гьунар бюхттулсса уна,
ТалихI чансса иявав?
Дагъусттан – зунттал буна,
Шихмунийн цан лавхъривав?..
Ура на зул дардирдай
КIинтнил дянив барз буна,
Ня-няйтIий бивтунни баргъ,
Къучагъсса гъили гьантрал
АьтIи бунни марххалтту.
Интнил тIар бияннинма
ТIутIайх бивчунни цIулит,
Кураггу хъян бивкIунни,
Бяст-ччаллий цIулитущал.
Ттун душвараха лащай
Вай авлиясса мурхьру.
Цала чIун дияннинма
Щар хьун гъирарай бивкIсса.
Къучагъсса гъили гьантри,
Аман, ккарксса макIъявав,
Мурчал бявкъусса шатри
Лехлахисса цанъявав?..
КъалирчIунни ца тIутIи
ТIутIайх бивчу мурхьирдай,
Авдалсса кураг, цIулит,
Ура на зул дардирдай!..
Дукьа дюхлулсса ка
Дукьа дюхлулсса ка
НенттабакIрая,
Вища ттул дард ласун
Бювхъусса тая?
ЛивчIунни махъ хъунмур
Ттул оьрмулул сун,
Вищарив къавхьунни
ДакIниймур ласун!
Бакъаяв бавкьуну
Цаннан ца жува,
Щин дяркьусса бия
БакIщаращива.
Дукьа ка дяркъусса
НенттабакIрая!
Жура ччаву дурсса…
Анжагъ макIрая!
* * *
Аман, ца уммай буван
Гьархьхьуну зурул мурччайн,
Чумартну чани бувсса
Вай лакрал мюрщи щархъайн!
Ччяни бувсса марххала –
ХъачI-бакIурдал кIяла кIиз,
Зурулу ттух ялугьлай –
Язи бувгьу кIалахIи!
Агь, цIубарз, агь, лаккудуш!
Агь, шярлуксса Иниший,
Ва аьжаивсса хьхьу на
Чув ядави, дишиви?
Мусил цIубарз, марххала,
Цалчин зунттавун бувсса,
Хханссар ттун шеърилул хха,
ТачIав бивкIу бакъасса!
Ура навалу
МикIлавчIун бур пукьа,
Дакъар цIу-цIанпир,
Майлул чирахъралгу –
Дахьвасса пIил-пIил.
Хъагь-къук тIий ура на,
ЦIий бур ттул гьутру,
ЧIирттайхгу дур занай
ЛухIисса ххютру.
Авлахърай мурхь куна,
Ура навалу,
ИвчIангу, уккангу
Къабулунна рай.
Парандарал къяртта
Щусса мурхь куна,
Чаннагу лахъанна
БивкIулул ссятрай!
Дугъримуниха
ЯтIулсса синттул тIутIив,
Аман, зул душманшиву,
Зул чIарав дур эмарат –
ДачIрасса щюллишиву!
Ци къачча ттун – ттяй-ттяйрду,
Къабайсса дакIнийн гъеди,
Ххирар ятIулсса тяйрду,
Авлахърайх байсса къидир!
Яру ххаллилсса душнил
СсанчIав сан къабай ссурмав,
Синааьрщарал ччиту?..
Хъинни магъ дакъа къурмяв!
Хъамигу бур бурхьнисса,
Арамталгу бур ццусса…
НицI уччиннин канарча,
КъадикIайссар нацIусса!
ЗахIматсса бур масъала,
БувчIин бан оьрмулул тIин:
Мунияр бигьар, дустал,
Лахьхьин бан ттуккун латIин!
Аьбдул-Камаллуя
Нигьаусайссар тIар
Шатта ххал хьу чув,
Агар хавар бакъа
ХIинча ккаккарча.
Бити тIутIайх бичлай
Багъраву бяъли!
Я Аллагь, къахьуннав
Аьрщарай дяъви!
Аьбдул-Камаллуя
Хьусса Алекси
Детдомрай акъаяв?
Ккавккунни миксса!
Нава къаччинангу
ЧIа тIий акъара
КIалаш кунма, кьавкьсса
ЧчатIул макьара!
ИвкIума чантI чинсса
ТIийра леххаву:
Маххяхларда, инсан,
ЦIарал неххавун!
Аьбдул-Камаллуя
Хьусса Алекси
Детдомрай акъаяв?
Ккавккунни миксса!
Хъячиннин ливгьуна
Ттул оьрчIшиврул къуп,
ЩийкIуй зулму буван
ПIякь къачиннав ттуп!
Жагьилсса ласваврах –
Ялугьлай къартту,
Мукьай хъатан дуллай
Лачакрал лантту.
Аьбдул-Камаллуя
Хьусса Алекси
Детдомрай акъаяв?
Ккавккунни миксса!
* * *
Ттул баваха лархьхьусса
ЧIярур хъами аьрщарай,
Амма, ттул баван кунма,
Жапа ккавксса къалякъай.
Агь, бавай, зунзулчаний,
Баргъ ссавнийх бачин байсса,
Цаннивавли на ваксса
Хъис виха къалавхьхьусса?
На сававну руртIусса
Вил макь цачIун дуварча,
Хьунссия биялсса бяр,
На начлил ассан ансса!
Леххаву тIий дур ттул дакI,
На багъишла ити тIий,
Ина язугъ барчагу,
Ттун ттуйва рахIму бакъар!
Дукки ттул бакIрайх кагу,
Михьлишанттул кьанкь дусса,
Буси хIазсса хаваргу,
Ттул дакIнин дарув хьунсса!
Агь, бавай, зунзулчаний,
Баргъ ссавнийх бачин байсса,
Цаннивавли на ваксса
Хъис виха къалавхьхьусса?
* * *
ЯтIул лавгсса
Пачлил чIарав
ЩябикIу, ятIул чIаврдуй,
Вил хьхьичI
Итабакьиннача
Балайрдал мусил найрду.
ТIутIайх бивчу
Багъри ттул дакI,
ТIитIинна вин
На му багъ.
ЯтIул чIаврдуй,
ЧIарав нану,
Язи бугьан ятIул гьивч!
Ци ххай бура
Жула оьрму,
АьтIий ва хъяй
Лагайсса,
Багьу-бизу
Сакин буллай,
Дувсси кунма,
Ссуссайсса?
Бухху ттул
ДакIнил багъравун,
Гъилисса гьава кунма,
Буххуча, рахIат ува на,
Гъарал щюлли багъ кунма.
Кьули-ВаличIа хъамалу
Тахлийн дур дагьну бава,
Кьавкь пялутрал ух кунна,
Гамур тахлий – мюрш оьрчIру,
Дахьва був чIиру кунма.
Пукьагу бур лухIисса,
Варши цирив къакIулсса,
Буруглай бур мурцIату
Ряхва я цIугъ-цIугъ бивкIсса.
Жандарм кунма, къудурсса
ЯтIул ажари хьулух
Эоь тIий бур бюхттулну,
Аьрщарал заллу хьуну.
Кьули-Валил, хъап куну,
Бувгьуна га ажари,
«Дуснан бихханна», – куна,
Лирчуна оьттул жартру.
Бучсса бия байчара,
Гадлулуксса дия ччан…
Махъва-махъсса ажари
Ттун ччай бакъая букан.
Кьули-Валий, ххирама,
Вил бакI кьукьивуй, яман!
Шяравугу яхъанай,
Къашайрив ятту ябан?
АьтIаву ва хъяхъаву
Ттун дур цал архIал лачIлай,
Авлиясса мартрал ссав –
Марххала ва баргъ бачIлай.
Кьавкьсса пялутрайн дурксса
ДирчIавай дур бавагу,
Му накьлу хьувкун, ина
Цири бантIиссавагу?…
Лагабаргъ
ДикIаннагу, дурагу
КIира чIара дур бакIрай,
Вай ттул кIиз баллуну тIий,
Кьини дуркххурав лакрайн?..
ХхюцIалчинмур инт ккаккан
Бакъар ливчIун хъунма хIал,
Лагабаргъ – Раяханум,
Машара ттуя махIрум!
Малагара зунттухун,
Ттул аьзизсса лагабаргъ,
ЯтIулсса ккацца кунма
Ссавнийх левххун нанисса!
Вания тиннай ттигу
На щих дуванссар эшкьи,
Ччавриясса балайрдан
Дакъар тти лирчIун щекьи!
Куклуну жагьилшиву
Ччи-ччинийх зизлай ивкIма
Оьрмулул байлитIулий
ЛичIайссар ятин куна!
Муна инагу ливчIун,
Лагабаргъ, инавалу,
Акъари ттулгу цукIуй,
Ках чинсса, цIими бувну!
Лагабаргъ, малагара,
Уручча на дякъия,
Оьргъасса аьрщарайри
Хъинну шайсса ххяххия!
Ттул ссурссулухун дича
Ми тIинтту – гъили кару,
КъабикIанссар мунияр
На жагьил ансса дарув!
Лакку билаятрал ялтту
Лакку билаятрал ялтту
Лерххун най дур самолет.
Ав ххал хьусса лачин куна,
Мюршну уруглай аьрщарах
Ур ца ттурусса пилот.
Ур ттурусса, ур жагьилсса –
Дахьвасса ссирссилттал ща,
Ласлай ухьунссар хIакьину
Ссавруннайх цалчинсса ша!
ЧIавахьулттицIун ккурккисса,
ЗуруцIун ттурлу кунна,
ЛарчIун дур ца аьжаивсса
Аьвзалзаманнал къари.
Ттуру пилот, ттурлу – къари,
Хъаттирдал лувгу аьрщи…
ЧIярур аьрщарай эяллу –
Левкьун лавгсса хияллу!
Кьепив буцIлай, кIисри тIитIлай,
Цирив тIий дур ттухь къари,
Самолетрал ххурххулувух,
ЦичIав баллай бакъари!
Арцул самолетрал ххютгу –
ЛухIисса чIимучIали,
ЛипI-липI тIий дур эяллаву…
Зунгу цичIав бувчIайрив?
Кьавкьсса щаращив кунмасса
Къарил яру хъавтуна,
Кьепив буцIлай, кIисри тIитIлай,
На иялну авттунав!
Дустал! Акъара на къагъа,
Къарил тIимур къабувчIин,
Аьрщарайгу хьуна гъалгъа,
Вана га гъалгъалул тIин.
– Ягъар, бавал! Часса ура?
Муксса жагьилну уна,
КъюкI-мурчIи хьусса урав?
– Акъарахха, ниттирссуй!
Ссавруннай учин къавхьумур
Шилу рахIатну буси,
Вил гьарца махъ – ттун муси!
– Дуссияв ттувурасса дард
Вищал кIидачIинна тIий,
Ва цIанасса лакрал авлад
Чунни лихълахъисса тIий?
Ккавкрив вингу? Вингу ккавкрив
ЧитIрал кьабивтсса кюртти?.. –
МахIатталну ттух дурургун,
Ларгуна къари зунттуйх!
Зунттухун га дахьларгуна,
МарцIсса интнил марч кунна,
Ттул дакI цIир-цIир тIун диркIуна,
Ссачма щусса бюрх кунна.
Гьай-гьайгу, хъинни шагьрурду,
ТIиртIунийн ка дияйсса,
Хъиннува хъинни барзунттив,
Хъазамрай цIуртти лавхъсса!
Хъин-оьбала гьарнан кIулли!
Чавахъ куртIний яшай тIар!
Лакрал магъулусса кIини
Ттигу умудрай бур тIар!..
Къачичав на шеъри щалва!
ПалцI бав мурцIувппай кьалан!
Оьрмулул цила лякъинссар
Къарил дардирдан чаран!..
