Гъумучиял школалий хьунни Ххувшаврил 80 шинан ва Ватан дуруччул шинан хас бувну 80 мурхь бугьлагьисса акция.
Совет Союзрал Виричу Якьуб Сулаймановлул цIанийсса багъраву Гъумучиял школалул учительтурал ва дуклаки оьрчIал бувгьунни ххюцIалва мурхь, хъиривсса субботникрай бугьан дакIний бур зувива ттигу.
Багъ бивщуссар 2022 шинал Бюхттулсса Ххувшаврил цIаний жанну дуллуминнал аьпалун. Муния шиннай школалий цIакь хьуну дур хъинсса аьдат – гьар шинал Ххувшаврил байрандалул хьунийн ва багъраву Ватандалул ххуллий жанну дуллуминнал аьпалун цIу-цIусса мурхьру бугьлагьисса.
Гьарцагу бувгьусса мурхь хъанахъиссар жула билаятрал тарихраву цал цIа чирчусса виричунал аьпа буруччаврил лишанну.
Зулайхат Тахакьаева
