Вай гьантрай МахIачкъалалив хьунни Буттал кIанттул цIанийсса Хъунмасса дяъвилий Ххувшаву ларсун 80 шин шаврин хас дурсса, аьдатравун дагьсса республикалул патриот акция «Аьпалул вахта».

Шикку гьуртту хьунни Дагъусттаннал Халкьуннал Мажли­с­рал председатель Заур Аскандаров, Дагъусттаннал ХIукуматрал председательнал хъиривчутал Рамазан ЖахIпаров ва Муслим Телякавов, МахIачкъала шагьрулул бакIчи Юсуп Умавов, жагьилтурал иширттал министр Камил Саидов, культуралул министр Зарема Буттаева, ми­ллатрал политикалул ва диннал иширттал министр Энрик Муслимов, Дагъусттаннал Мюхчаншиврул советрал секретарь, Аьра­сатнал Виричу МахIаммад Баачилов, Аьрасатнал Вирттал Загьид Загьидов ва Тамирлан АбутIалимов, Ветерантурал советрал председатель МахIарам Аьлиджанов, жагьилтурал ва жяматийсса организациярттал вакилтал, юнармейцы.
МахIачкъалаллал Хъун майданния аьралий оркестрданухун акциялул гьурттучитал бувкIунни Лениннул Комсомолданул цIанийсса паркиравун, дирхьунни тIутIив аьраличунал гьайкалдануцI, баян бунни минутрайсса пахъ багьаву.

Митинг тIиртIунни Заур Аскандаровлул. Дагъусттаннал бакIчи Сергей Меликовлул цIания ванал барча бунни гьур­ттучитал «Аьпалул вахта» акция тIитIаврищал.
Заур Аскандаровлул дакIнин бувтунни, цинярдагу эпохардал вирттаврал, хасъсса аьра­лий операциялулминналгу хIурматран, жула президентнал 2025-ку шин Ватан дуруччул шинну баян бувшиву, Дагъусттанная Ватан душманная дуруччин лавгсса 180 азара инсанная бачIиннуяр ххишаласса зана къавхьушиву. КIицI лавгунни «Аьпалул вахта» Буттал кIанттул цIанийсса Хъунмасса дяъвилий талай бивкIминнал, Ватан душманная мурахас дурминнал чувшиву дакIнин дутлатисса, хъуннасса агьамшиву ду­сса акция душиву.
Цала ихтилатраву МахIарам Аьлиджановлул барчаллагь увкунни дяъвилий жанну дуллуми абадлий дакIний личIаву мурадрай хIакьину хъуннасса даву дуллалисса Ххувшаврил волонтертурахь, юнармейцынахь.

Аьрасатнал Виричу, аьралий летчик, полковник Николай Ярцевлул кIицI лавгунни, хIакьину тарихчитал ва политиктал та дяъвилул тарих баххана бан, жува пахрулиймур къабитан хIарачат буллалисса чIумал жула вирттал дакIнин бичлачи­сса «Аьпалул вахта» акциялул цуксса агьамшиву дуссарив.
– Ххирану дарцIуссар жунна Ххувшаву, 26 миллиондалия ливчусса инсантурал жанну ду­ллуссар жува паракьатну оьрму бутланшиврул. На вихра, ялун нанисса никирал дуруччиншиврий жула аьдатру, миннан хъамакъабитаншиврий жула тарих, – увкунни ванал.
Митинг къуртал хьуну махъ гьурттучитурал дирхьунни тIутIив Вирттаврал аллеялий, бувгьунни мурхьру.
Росгвардиялул МахIачкъа­лаллал соединениялул аьралийтурал тIивтIуну бия Хъун дяъвилул чIумал кунмасса полевая кухня.

Андриана Аьбдуллаева