Майрал 5-нний Каспийск шагьрулий шадлугърал даражалий хьунни 2022 шиная шихуннай Дагъусттаннал бакIчи Сергей Меликовлул сипталийну дуллалисса «Ххувшаврил Ттугъ» акция.
Шикку гьуртту хьунни Сергей Меликов, властьрал органнал вакилтал, Аьрасатнал Виричу Тамерлан АбутIалимов, Украиннал аьрщарай нанисса хасъсса аьралий операциялий гьуртту хъанахъисса аьралийтал ва миннал ниттихъул, кулпатру, юнармейцы, кадетътал, жагьилтурал ва студентътурал жяматийсса вакилтал. Ва кьини­сса яла хIурматрайма хъамаличу ия Хъун дяъвилул ветеран Муса Багьауттинов.
Акциялул парад дайдирхьуна шагьрулул майданнив Кутузовлул 2-мур даражалул Ордендалул 150-мур Идрицкий стрелковый ди­визиялул Ттугъ гьаз баврийну. Му гьаз бунни Аьрасатнал Виричу Тамерлан АбутIалимовлул, «Координационный совет ветеранских организаций участников и инвалидов афганских событий, семей погибших» ДРОО-лул председатель МахIаммад Аьри­повлул ва МахIачкъалаллал 39-мур лицейрал 9-мур классрал дуклаки оьрчIал Аьбдулхаким Исмяиловлул.
Сергей Меликовлул барча бунни акциялул гьурттучитал ва бусравсса хъамал.
– Ххувшаврил Ттугъ хъана­хъиссар Аьрасатнал реликвия, Буттал кIанттул цIанийсса Хъунмасса дяъвилий совет халкьуннал ларсъсса Ххувшаврил лишан. МяйцIалла шинал хьхьичI кунма, хIакьинугу жущава, циняв цачIун хьуну, цаннал чIарав ца бавцIунур Ххувшаву ласун бюхъантIисса. Жунма Буттал кIанттул цIанийсса Хъунмасса дяъвигу, та дяъвилул виртталгу дакIний бушиву – мури жула яла цIакьмур неонацизмалийн бурган бувсса ярагъ. ЦIанагу хасъсса аьралий операциялий гьуртту хъанахъисса аьралийтал ва миннал чIарав бацIлацIисса инсантал умуд бивхьуну бур Хъун дяъвилий буттахъал кунна, Ххувшавугу ларсун, Аьрасатнал ятIул ттугъ гьаз баншиврийн , – увкуна Сергей Меликовлул.
Гьашину акциялувух хIала бувххунни республикалул 45 муниципалитет, шикку гьуртту хьунни 100 азарунния ливчусса инсантал.
Дагъусттаннал бакIчинал кIицI лавгуна, акция ялу-ялун машгьур хъанай душиву. Ларгсса шиналсса акциялувух хIала хьушиву Ухссавнил Ккавкказуллал федерал округрал регионну ва Ставропольлал край.
Ххувшаврил 80 шинал юбилейран хас дурсса акциялий гьуртту хьунтIиссар 200-рахъул хьхьурдай ва кьинирдай бацIаву дакъа оьсса талатавуртту най диркIсса Волгоград шагьру. Майрал 8-нний Ххувшаврил Ттугъ тIитIин бантIиссар Мамаев кургандалийсса «Родина – мать зовет» тIисса гьайкалданучIа. Ххувшаврил лишанну хъанахъисса Ттугълил копия тапшур бантIиссар вайннахьхьун.
– СталинградуллачIа най диркI­сса къизгъинсса талатавурттаву гьуртту хьусса Дагъусттаннал саллатI ва хIаписартал дунияллийх машгьур хьуссар. Душманная Ватан дуручлай бивкIсса чIявуми саллатI талатаврил цIарава зана къавхьуссар. Мамаев кургандалий чирчуну дурссар Совет Союзрал Виричу Ханпаша Нурадиловлул цIа. СталинградуллачIасса талатавурттаву къучагъну талай бивкIссар Совет Союзрал кIийла Виричу АхIмад-Хан Султан, Совет Союзрал Вирттал Зулпукьар АьбдурахIманов, ЦIаххуй Маккаев, Николай Подорожный, Илья Тахтаров. Вирттаврал цIарду абадлий ядаву ялун нанисса никирал буржри, – увкуна Сергей Меликовлул.
Парадрай гьуртту хьунни хасъсса аьралий операциялий Ватандалул мурадру буручлай чувшиврий жан дуллусса МахIач Сайкумовлул нину Ххадижат, Аьра­сатнал Виричу НурмахIаммад ХIажимахIаммадовлул нину Сапижат Мазаева.
Шадлугърал мажлисрал ахирданий Ххувшаврил Ттугъ тапшур бунни хасъсса аьра­лий операциялул гьурттучи, ДР-лул Халкьуннал Мажлисрал ветерантурал ва СВО-лул гьурттучитурал иширтталсса буллалисса комитетрал председатель Аьбдуллагь МахIаммадовлухьхьун. Ванал бакI дургьусса автоколонна Каспийскаллал Хъун майданния дайдирхьуну гьантIиссар Ухссавнил Ккавкказуллал Федерал округрал регионнайн. Махъра-махъ колонна диянтIиссар Волгоградрайн.
Мероприятие къуртал хьуна Каспийскаллал флотилиялул, Каспийскаллал аьралий гарнизондалул, Росгвардиялул, МЧС-рал подразделениярттал, кадетътурал, «Юнармиялул» марширдайну.
Имара Саидова