Инсаннал оьрмулуву луттирал бугьлай бур хъунмасса кIану. Ваниву ляхълай дур чIявусса суаллахьхьунсса жавабру. Луттирал инсаннал оьрму авадан буллай бур, чаннал буцIин буллай бур. «Библиотекалущалсса кIул шаву. Лу ва библиотека инсаннал оьрмулуву» тIисса цIанилусса дарс хьунни Гъумук Райондалул оьрчIал библиотекалий.
Дарсирайн бувкIун бия Гъумучиял дянивмур даражалул школалул 1-мур «а» классрал дуклаки оьрчIру ва классрал каялувчи Зулайхат Кьурбанова. БатIаву дачин дурсса ЦБС-рал директор Мариян Аьшаевал оьрчIру кIул бувна библиотекалуву шиннардий цIакь хьусса аьдатирттащал, библиотекалул тарихращал, ккаккан бувна библиотекалул фондравусса оьрчIансса личIи-личIисса луттирду. ТIуркIулул журалий кIул бувна оьрчIру луттирдал дунияллий машгьурсса мукъурттищал: «обложка, суперобложка, титульный лист, переплет» ва м.ц. БувчIин бувна «абонемент, читальный зал, книгохранилище» цирив. ОьрчIахьхьун буллуна «Вил оьрмулуву луттирал ци кIану бугьлай бур?» тIисса суал. Ванихунсса жавабирттащал оьрчIал мукунма цайми-цайми суаллахьхьунссагу жавабру дуллай бия: аьркинссарив хIакьину жунма библиотекартту ва луттирду, бугьантIиссарив интернетрал луттирал кIану. ОьрчIал бувсуна цалва ттинин бувккусса луттирдая, яла ххирами произведениярттая.
Библиотекалийн бувкIсса оьрчIах ялугьлай дия чичултрал язими магьри бусса луттирдал выставка.
Ва кьини шиккун бувкIсса оьрчIал чIявуминнал ва библиотекалийнсса цалчинсса аьрххи хъанай бия. Мунияту библиотекалул зузалтрал шаймур бувну бия оьрчIан ва кьини дакIний личIаншиврул, вайннан шиккун ялагу, ялагу букIлансса гъира бикIаншиврул.
Бадрижамал Аьлиева
