Гьарца шинал апрельданул 12-нний щаллагу дунияллий кIицI лагай Космонавтикалул кьини. Лакрал райондалул шяраваллал школардай ва библиотекарттай хьунни ва Кьинилун хас дур­сса шадлугъру.

Гъумук Центральный библиотекалий Космонавтикалул кьинилун, инсаннал космосравунсса цалчинсса леххаврин хасну хьусса батIаврий библиотекарь Диана Гадаевал бувсунни дуклаки оьрчIахь билаятрал космонавтикалул гьану бивзсса аьлимчув К.Э. Циолковскийл, аьлимчув, конструктор, академик С.П. Королевлул оьрмурдая, вайннал каялувшиндаралу дурсса цалчинсса ракетарттая, спутникирттая ва космосравун леххайсса жамирдая. Бувсунни Юрий Гагариннул дурсса виричувшиврийн бувну жува ва ишираву цалчинмину хьушиву ва космосравун леххаву тти аьдатсса иширан ккаллишиву, бувсунни тIивтIусса космосравун цалчин увксса А. Леоновлуя ва цалчинсса космонавт-хъамитайпа В. Терешковая, Совет Союзрал Виричув М. Маннаровлуя.

Дуклаки оьрчIал дурккунни цалчинсса космонавтнан хас дурсса назмурду, гьуртту хьунни космосрацIун дархIусса викториналий, ххал дунни ва кьинилун хас дурсса луттирдал выставка.
ШавкIрав, школалул, Аьра­сатнал Халкьуннал аслий­сса культуралул центрданул ва библиотекалул цачIуну дунни «Космическое путешествие» тIисса шадлугъ. Ингилис мазрал учитель Гульнара ЦIургъуловал дуклаки оьрчIахь бувсунни дунияллий цалчин космосравун левхсса совет космонавт Юрий Гагариннул оьрмулия, ванал дур­сса хъуннасса виричувшиврул агьамшиврия. Хъирив оьрчIру бувккунни космосравунсса виртуал аьрххилий, гьуртту хьунни «ЦIуртти ва планетартту» тIисса викториналий ва космический жами баврил мастер-классрай.
ШавкIуллал школалул 5-мур классрал дуклаки оьрчIру тIурча лавгунни Гъумукун, летчик-космонавт Муса Маннаровлул къатлувун-музейравун биян. Шикку музейрал директор Аьбидат Макьаевал бувсунни оьрчIахь тIивтIусса космосравун 7-ла увксса, щаллу­сса шин космосраву дурну, дунияллул рекорд дирхьусса ла­ккучув Муса Ххирамановичлул ­оьрмулия, ккаккан бунни оьрчIан ва иширацIунсса экспонатру ва видеоролик.
КIундиннал школалул ва шяраваллил библиотекалул цачIуну хIадур дурну дия ва кьинилун хасъсса батIаву. ОьрчIал дирхьуну дия космосрацIун, совет инсаннал дурсса бюхттулсса виричувшивруцIун дархIусса суратру.

Вара журалул батIавуртту хьунни Щардал шяраваллил библиотекалийгу, шяраваллил дянивмур даражалул школалущал цачIу хIадур дурну, мукунна ЧIарттал ва Хьурттал библиотекарттайгу. Шиккугу хьунни космосраясса, цалчинсса космонавтнаясса, гания шийнмайгу, хIакьинусса кьинигу ва бигьа дакъасса давриву дуллалимуниясса ихтилатру.
Космосравунсса цалчин­сса леххаву хьусса кьини шиная шинайн арх хъанай дур жуятура. Амма жулва буржри ва тарихийсса иш щаллу хьуншиврул хъунмасса захIмат бивхьуми дакIний битаву ва махъа нанисса никирттахьгу вайнная бусласаву – вана укунсса мурад ва оьвчаву дия вай мероприятияртту хIадур дурминнал.