Вай гьантрай Аьрасатнал Госдумалул депутат Жамалуттин ХIасанов даврил аьрххилий увкIунни Лакрал райондалийн.

Цалчина-цалчин депутат хьунаавкьунни хасъсса аьралий операциялий чувшиврий жанну дуллуминнал ва хIакьинугу ватандалул мурадру буруччаврил ххуллий талатиминнал гъанчунащал. Ххал бивгьунни вайннал кулпатирттан кумаг баврил ххуллийсса агьамсса суаллу. Гьарцаннал тIутIимуних вичIи дирхьуну, депутатнал тапшур бунни жаваблувсса инсантурайн вайннал суаллах хасъсса къулагъас дуллан.

СВО-лул Ветерантурал а­ссо­циациялул ва «Память гор» ДРОО-лул Лакрал райондалий­сса отделениялул хъунама Юнус Эфендиевлущал депутатнал ххал бивгьунни хасъсса аьралий операциялий гьуртту хъанахъиминнал ва вайннал кулпатирттан кумаг баврийн багьай­сса масъалартту.
– Жула буржри вирттаврах аякьа даву, – увкунни депутатнал.

Мичча Жамалуттин ХIасанов лавгунни Гъумучиял школалул хIаятравусса хасъсса аьралий операциялий жанну дуллуминнан цIа кусса Аьпалул багъравун. ТIутIив дирхьунни чувшиврий жанну дуллуминнансса мемориалдануцI. КIицI ларгунни ватандалул мурадру буручлай жанну дуллуминнал аьпа ябаврил ххуллийсса давурттал агьамшиву.
– Жува буржлувссару ватан­далул мурадру буруччаврил хху­­л­лий чувшиврий жанну дуллуминнал аьпа никирая никирайн буручлан, – увкунни депутатнал.
Ватандалул цIаний жанну дуллуминнал аьпа абад баврил лишан хIисаврай бувгьунни Аьпа­лул багъраву мурхьгу.
– Гьарца бувгьусса мурхь хъанахъиссар оьрмулул ва жула ялун бучIантIимунил цIаний жанну дуллуминнансса барчаллагьрал лишанну. Жула буржри вайннал аьпа жула хъирив наниминнайнгу тапшур бан, – увкунни депутатнал.

Муния махъ депутат хьунаавкьунни школалул педагог­туращал, ххал бивгьунни ялун нани­сса ник ватан ххирану тарбия даврийн ва хасъсса аьра­лий операциялий гьуртту хъана­хъиминнал кулпатирттал чIарав бацIаврийн багьай­сса масъалартту. Педагогтурал барчаллагь увкунни хъамаличунахь къулагъасрахлу ва тарихийсса аьпа ябаврил ххуллийсса захIматрахлу.
Яла, тIурча, Жамалуттин ХIа­сановлул кьамул бунни район­далул агьали.
Агьалинал чулухасса яла цIю­­­­рувкьуми суаллу бия газ буцав­рийн, буллай байгубивхьуну, ссайн бувкссарив къакIулнува ливчIсса, ШавкIрату Щаравсса ламуйн, дурну къуртал къашай­сса азарханалул къатрайн, райондалий ттукI биял хъанай ба­къашиврийн багьайсса.

Газрал хIакъираву бувсунни 2027-ку шинал итадакьин кка­ккан дурну душиву магистрал турба буцинсса арцу.
ШавкIрату Щаравсса ламул хIакъираву бувсунни хьхьичI­расса проект тIайла да­къа дурну диркIшиву, цIана зий бушиву цIусса проектраха.
Жамалуттин ХIасановлул тапшур бунни жаваблувсса инсантурайн агьалинал чулухасса гьарца оьвчаврил ялув бацIан.
– Агьалинащалсса тIивтIусса ихтилат – мури жул даврил гьану. Так цачIур жущава бюхъантIисса райондалийсса оьрму къулай бан, – увкунни депутатнал.

Зулайхат Тахакьаева