Янин чани бакъаминнансса хасъсса библиотекалул коллектив царагу байрандалул, царагу Кьинилул чIарах къабуккайссар. Мукун, февральданул 22-нний шикку хьунни Ниттил мазурдил кьинилун хасъсса «Язык родной – дружи со мной» тIисса цIанилусса шадлугъ.
Ва сакин дурну дия библиотекалул, ВОС-рал (Всероссийская организация слепых) МахIачкъалаливсса отделениялущал ва ВОС-рал МахIачкъалаливсса ЦТКНР-лул Культуралул къатращал цачIуну.
Библиотекалул зузалтрал цалва буккултрал хьхьичI увкуна балайрду, дурккуна назмурду ва личIи-личIисса мазурдийсса учалартту ва лувлякъурду, хIадур дурну дия викторинарду ва конкурсру. Байрандалун хасну сакин дурну дия луттирдал выставкагу. Шикку бия Дагъусттаннал халкьуннал тарихраясса, культуралиясса, багьу-бизулиясса луттирду, словарьду ва мазурдил самоучителлу.
Байрандалийн бувкIминнал хьхьичI тIивтIуна личIи-личIисса миллатирттал дукрардащалсса ссупрагу.
Бадрижамал Аьлиева
