Янин чани бакъаминнансса Республикалул хасъсса библиотекалул уттигъанну цалва буккултран дунни П.С. ХIамзатовал цIанийсса Дагъусттаннал изобразительный искусствардал музейравунсса экскурсия.
Ва кьини музейравун цалчин бувхминнавух бия мурчIиминнансса ва чани чанминнансса Дуккаврил ва реабилитациялул «ИхIсан» центрданул тарбиялувтал. Музейрал элмийсса зузалтрал бувсуна вайннахь ккаккиялун дирхьусса суратирттая, вайннуй ккаккан дурмуния ва вай чичаврил тарихрая. Ва кьини оьрчIан сурат дишаврил искусствалийн багьайсса чIявусса затру кIул хьуна.
Хъирив музейрал зузалтрал ва ялун бувкIсса хъамаллурал куннал куннан бахшишругу дурна. «ИхIсан» центрданул дуклаки оьрчIал музейрал зузалтран бахшишран бувккуна Расул ХIамзатовлул шеърирду. Библиотекалул зузалтрал музейран пишкаш бувна Брайллул мазрай чивчусса Расул ХIамзатовлул произведениярттал цIусса жуж. Музейрал директор СалихIат Расуловнал библиотекалун пишкаш бувна цуппа авторсса лу-альбом «Ттул Дагъусттан. Жула Расул» тIисса.
«МурчIиминнангу, чани чанминнангу музейрдавун занан ссан аьркинссарив къабувчIлачIиссагу бикIай. ЧIявусса шай дирхьусса суратрай – искусствалул произведениялий бумур мукъурттийну бусласаврих шардагу вичIи дишин хьунссархха янин чани бакъаминнаща, музейрдавун къабувкIна тIиссагу. Амма вайва махъру янин чани буминнаягу учин хьунссар – шавату кьатIув къаувкна выставкалийнсса онлайн-тур дуван бюхъанссархха куну. Янин чани бакъаминнангу аьркинссар музейрду, цанчирча, чурххал каширдах, бюхъу-хъитлих къабурувгун, гьарцагу инсаннан щуркIал шайну тIий музейравусса ляличIисса атмосфера», – бувсунни библиотекалул Инклюзивсса ва творчествалул методикарттал центрданул хъунмур Жанна Аьлиевал.
Ва аьрххи хьунни мурчIиминнансса ва янин чани чанминнансса социокультуралул реабилитация хIисаврайсса «ПРОзрение» Центр сакин баврил «РосмолодежьГрантылул» СКФО-лунсса грантрал проектрал лагрулий.
