МахIачкъала шагьрулул 25-мур школалий хьунни «Парта Героя» тIисса Щалагу Аьрасатнал кIулшиву дулаврил проектрал лагрулийсса мероприятие. Шикку «Виричунал Парта» тIиртIунни школалул выпускник, лейтенант, Чувшиврул ордендалул кавалер, хасъсса аьралий операциялий къучагъшиврий жан дуллусса, Аьбдулбасирдул арс Ислам АьбдурахIмановлун.
Аьпалул мажлисрай гьуртту хьунни МахIачкъала шагьрулул КIулшивуртту дулаврил управлениялул методический отделданул хъунмур Зулгьижат Аьбдулжалилова, Красноармейск поселокрал Агьалинащалсса даврил управлениялул отделданул хъунама Аьбдулаьзиз МахIаммадов, школалул директор Асват Бакунова, дуклаки оьрчIру ва учительтал. Мероприятиялул сиптачи ва сакиншинначи хьунни АьФ-лул ва ДР-лул кIулшивуртту дулаврил хIурмат бусса зузала, ШавкIуллал шяравасса Кьурбаннул душ Асват Бакунова.
Аьдатравун дагьсса куццуй, мероприятие дайдирхьунни Аьрасатнал гимнрая. Хъирив ихтилат бунни Асват Бакуновал.
– Билаятрал вирттал дакIний битаву – му жула буржри. Ватангу, жулла паракьатшивугу дуручлай къучагънал кунна жан дуллуссар Ислам АьбдурахIмановлул. Ислам школалийгу, институтраву хьхьичIунну дуклакисса, цинявннан эбратрансса жагьил икIайва. «Вирттаврал Партардал» биялалийну хIакьину жула школалий дуклакисса оьрчIан абадлий дакIний личIантIиссар къучагъсса ватанлувтурал цIарду. Му бакъассагу, ва проект хъанай дур Ватандалул мурадру буруччаврил ххуллий чувшиву дурсса аьрасатлувтурая бусласисса, миннал суратирттащалсса дуклаки оьрчIансса стол, – увкунни Асват Бакуновал.
«Виричунал Парта» тIитIин вихшала дунни мероприятиялул хъамаллурайн. Цинявппагу ихтилатру буллалими бия, утти жува вай вирттаврая гъалгъа тIийнма личIаннав, жунма тачIав дяъвилул чIу къабаяннав тIий.
Дуклаки оьрчIал хIадур дурну дия ххаллилсса программа.
Асват Бакуновал барчаллагь увкуна патриот акциялий гьуртту хьун бувкIминнахь ва хасъсса аьралий операциялий Ватандалул ххуллий чувшиврий жан дуллусса Виричунал гъан-маччанахь.
Ислам увну ур 1999-ку шинал майрал 20-нний МахIачкъалалив. Мусил медальданий школагу къуртал бувну, дуклан увххун ур Санкт-Петербургуллал Политехнический институтрал хьхьирил-портрал ядерный энергетический установкарттал факультетрайн.
Куннил хъирив кув кIира шинай гьуртту хьуну ур Москавлив ЯтIул майданнив хьусса Ххувшаврил байрандалул парадрай.
ХьхьичIунсса хIасиллай институтгу къуртал бувну, къуллугъ буллай ивкIун ур оператив ва бияврил хIадуршиннарду даврил аьралий частьраву хIаписарну. Къуллугърал бурж дакI марцIну биттур буллалисса, гьарица чулуха низам дусса, вихшала дишинсса хIаписар ччяни итталун агьну ур.
Хасъсса аьралий операциялий гьуртту хьунсса хIукмугу Исламлул цалва бувну бур. 2022-ку шинал аьпалул хьуну ур оьрмулул 23 шинаву.
ХIакьину Ислам дуклай ивкIсса институтрал чIирайн лархъун дур хьхьичIунну дуклай, эбратну ивкIсса хIаписарнал аьпалул ула. Дуклакисса шиннардий вузрал профессортурал ва преподавательтурал чулухасса цикссагу Барчаллагьрал чагъарду бувкIун бур Исламлул нитти-буттайн ва школалул дирекциялийн.
Цува хъуна хьусса Красноармейск поселокрай бур къучагънал цIанийсса кIичIира, буттал къатрал чIирайнгу ларчIун дур аьпалул ула.
Чаннасса, яргсса ва ялун нанисса никиран эбратрансса бур 23 шинавусса жагьилнал бивтсса аьралий ххуллу.
