ЧIявусса аьралийтурангу, жяматийсса организациярттан ва укунмасса инсантурангу ххуйну кIулссар ва бавссар хасъсса аьралий операция байбивхьуния шихунмай аьрайн гьан бан хъамул чирахъру буллалисса ЦIуликъяннал шяравасса, МахIачкъалалив ялапар хъанахъисса Илиясовхъал кулпатрая.

Вайннал квартиралува аьрайн­сса чуваллу, къуршив, кьуцуртту буккан къабуллали­сса кьини къашай. Цаннал ттирсумур цаннал дазлай, цаннацIун ца бавкьуну, аьрайнсса хъамул чирахъру буллай байбивхьуна ХIажи ва Маржи, щала квартирагу дуссукъатлуйн кIура баен бувну. ХIат-хIисав дакъар вайннал аьралуннан бувсса кумаграл.
Чирахъру буллалаврий гьашиву къадурну, ларгсса шинал, цала лагма-ялттумигу кIункIу бувну, Илиясовхъул щашлан бивкIунни маскировочный къертту.
ХьхьичIсса шиннардия къатIурчагума, 2024-ку шинал махъсса ва гьашинусса ца-кIива зурул дянив вайннал гьан бувну бур аьралийтуран 5 азарва хъамул чирахъ, маскировочный къертту, лултту-ялттусса, дука-хIачIанмур къахIисавну.Вайннал адрес кIулну дур аьралийтурангу, аьрайн гуманитар кумаг биян буллалиминнангу. Цила даврил уртакьтуращал Маржи цуппагу кIийла лавгун бур аьралуннан аьркинмур диян дан. Вайннал дуллалимуницIун кумаг буллалисса, чIарав бацIлацIисса, дакI цIуцIиссагу чансса бакъар, амма хъунмур хъар кулпатрал цала лахълай бур. Хаснува ХIажинал. Ванал бакI гьаз данссавагу мажал бакъар. ­Аьрайн нанима, аьр­ххилий укканнин, вайнначIан най ур, ласунсса ци дурив ххал дан. Мунияту аьрайнсса кумаг мудан хIадурнува бур вайннанний.

-– Гъинттул чIумал чирахъру бансса хIадуршиннарду дурну дирхьуссия, ай, балики дяркъу хьуннин тай иширттал ахир хьунхьуви тIисса умудрай. Хъунмур гуж къертту щащаврийн бувтссия. Яла чирахъругу бутIлан багьунни. Маржил цила дустурахь, мачча-гъаннахь, кIулминнахь тIий, виргъантру, кIараллу, лултту-ялттуссагу салкьи дай. Цимурца хIадурну дитару хъирив бучIаннин. Нанинахьхьун дулару. Отпускалий бувкIсса аьралийтал махъунмай нанийни, чара бакъа жуннийн буххайссар. Уссия Чапаеволиясса Аьлибаг, КIундиятусса Казбек, уссия ца оьрус оьрчIгу. УвкIуна Манасраясса даргиричу, Илияс тIисса, навтлиха зузи­сса идаралул хъунаману ивкIсса ия. Гьарзатгу кьариртун, аьрайн лавгун ур. Казбековуллал райондалиясса ия Заирбек тIисса (позывной «Бек»). Мукьва оьрчIал ппу. Мудан хьхьичIххуттай авцIусса, чIявусса ккавксса ия, – буслай ур ХIажи.
Цивппа аьралийтал бакъа­ссагу, вайнначIан гуманитар кумаграл хъирив букIлай бур Халкьуннал фронтрал, Жяматийсса палаталул, Жагьилтурал парламентрал вакилталгу.
Хъамул чирахъру баврил, къертту щащаврил мастер-классру ккаккан бан Илиясовхъул лагай личIи-личIисса школардайн ва цаймигу идарар­ттайн. Мастер-классгу ккаккан бувну, къертту щашлансса хахгу буллунни жула лаккудуш Альбина Шутуновал каялувшиву дуллалисса Республикалул гьунар бусса оьрчIансса чIяру профильлу дусса лицей-интернатран. Утти шиккугу щашлай буссар къертту. Лицей-интернатрал преподаватель ХIуризат Мажидовна цалчинсса гьантрая шихунмай Илиясовхъал дуллалимунил чIарав буссар. Ва лавгссия Маржищал хасъсса аьралий операциялийминнан гуманитар кумаг биян бангу, Хъунзахъиял райондалий мастер-класс ккаккан байнигу. Мастер-класс ккаккан бан лавгссар вай Хъунзахъиял райондалийсса Батлаич тIисса шяравун. Ши­ккун бувкIун бур лагма щархъаясса инсанталгу. Уттигъаннурив вайннал ккаккан бунни мастер-класс Навтлил ва газрал колледжрал студентътуран: Маржил – къертту щащаврил, ХIажинал – хъамул чирахъру баврил. Колледжрал директор Аьлишер КьурбанмахIаммадовлул буллунни Илиясовхъан Барчаллагьрал чагъар.
Илиясовхъал дуллалимунил чIарав бацIлай, ка-кумаг буллай бур вайннал чIахху-чIарахмигу. Маржи барчаллагьрай бур гьарица кьини къертту щашлан букIлакIисса ва гуманитар кумаг батIин хIарачат буллали­сса ШавкIратусса ПатIиматлуйн, даргиридуш Раисатлуйн.
ДакIнин бутан, аьралуннан кумаг буллалисса чумартсса даврихлу Маржин дуллу­ссия ПаччахIлугърал награда – АхIмад-Хан Султаннул медаль ва Дагъусттаннал Хъаннил союзрал чулухасса «За любовь к Отчизне» медаль. Мукунма ва лайкь хьуссия Да­гъусттаннал бакIчи Сергей Меликовлул чулухасса Барчаллагьрал чагъарданун. ХIажиналгу дур цала захIматрайну лайкь дурсса личIи-личIисса идарарттал чулухасса ХIурматрал грамотартту.
Я Аллагь, Илиясовхъалгу, цайминналгу буллалисса кумаг цадакьану бацIаннав. Ххувшаву ларсъсса кьини ччяни дучIаннав.