Февральданул 25-нний МахIачкъалалив хьунни гостиницарду ва республикалийн бувкIсса хъамал бацIайсса цаймигу кIанттурду террорданул иширттаща мюхчан баврил масъалартту ххал бигьлагьисса семинар-совещание. Шикку гьуртту хьунни Дагъусттаннал туризмалул министр Эмин Мерданов, УФСБ-лул, Росгвардиялул, МЧС-рал Агьаммур управлениялул вакилтал, ихтиярду дуруччай органнал зузалт, мукунма гостиницардал, санаториярттал ва республикалийсса хъамал бацIайсса цаймигу кIанттурдал хъуними.

Министрнал кIицI лавгунни шиная шинайн Дагъусттаннайн букIлакIисса туристътал чIяву хъанай бушиву, мунияту туристътурал мюхчаншиву дузал даврил, миннан бигьа-рахIатсса шартIру дузал даврил масъала хьхьичI ххуттайн ласун багьлагьишиву. Хъамал бацIайсса кIанттурду террорданул иширттая мюхчан бансса чаран лякъаву бия мероприятиялул агьаммур мурадгу.
МЧС-рал вакилнал кIицI лавгунни хьхьичIва-хьхьичI цIарая ва цаймигу ЧС-дая бурувччуну бикIан аьркиншиву.
Полициялул зузалал кIицI лавгунни туристътал бацIайсса кIанттурду нигьачIисса иширттая, хаснува террордания, бурувччуну бикIан аьркиншиву, му масъалалул жаваблувшиннагу хъунмурчIин гостиницардал, турбазардал хъуниминнай душиву. Семинарданул лагрулий гостиничный бизнесрал вакилтурал ва экспертътурал кIулшивуртту ва опыт кIибавчIунни.
Андриана Аьбдуллаева