Февральданул 21-нний Гъумук хьунни хасъсса аьралий операциялий Ватандалул ххуллий чувшиврий жан дуллусса АхIмадханов Сулайман Жабраиллул арснал аьпа абад буллалисса мероприятие. Къучагънал сурат лархъунни хьхьичIавасса лицейрал чIирайн.
Виричу дакIнин утан бувкIун бия райондалул администрациялул ва идарарттал зузалт, гъан-маччами, дуклаки оьрчIру.
Сулайман увну ур 1991-ку шинал декабрьданул 17-нний Гъумук. 2009-ку шинал къуртал бувну бур школа. 2011-ку шинал къуллугъ буллай ивкIун ур аьралуннаву. 2019-ку шинал цала цалчинсса контрактгу чирчуну, къуллугъ буллай ивкIун ур Симферопольлай. 2023-ку шинал июньдалул 16-нний кIилчинсса контрактгу чирчуну, лавгун ур хасъсса аьралий операциялий неонацистътуращал талан.
Талай ивкIун ур Донецкаллал областьрай. 2024-ку шинал сентябрьданул 1-нний ватандалул ххуллий аьралий мурад биттур буллалисса ца талатавриву чувшиврий жан дуллуну дур.
Райондалул бакIчи Юсуп МахIаммадовлул кIицI лавгунни, ватандалул мурадру биттур буллай, цала жанну хIайп къакусса вирттал абадлий яхьун тIий бушиву агьалинал дакIурдиву.
«Сулайман ия хIакьсса патриот, яхI, къирият ва чувнал бурж кIулсса чув-адамина. Жунма тачIав дакIния буккан къабучIиссар махъ ливчIминнал пахрулунсса ванал виричушиву», – увкунни Юсуп МахIаммадовлул.
Сулайманнул нитти-буттахь ва къучагънал аьпа абад баврил ххуллийсса даву дурминнахь барчаллагь тIисса ихтилатру бунни ФСБ-лул отставкалийсса полковник, Чувшиврул ордендалул кавалер Жамалуттин Жамаловлул, МахIаммад Хъунбуттаевлул, райондалул Хъунисриннал советрал хъунаманал хъиривчу МахIаммад Ссунгъуровлул.
Лакрал ва Ккуллал районнал аьралий комиссар Аьли ГъазимахIаммадовлул Чувшиврул орден дуллунни Сулайманнул ниттихьхьун ХIалимат АхIмадхановахьхьун.
Сулайманнул гъан-маччаминнал барчаллагь увкунни райондалул каялувчитурахь ва ватанлувтурахь гъанчунал аьпа абад бансса даврихлу. Мероприятиялийн бавтIцири, аьпалул улттуцI тIутIивгу дирхьуну, къучагъ дакIнин утан ца минутIрайсса пахъ багьунни.
Укунсса мероприятияртту ливтIуминнан дакъарча аьркинсса, сагъминнанни, цал ххишалану дакIнин бутаншиврул агьалинан жула билаятрал мюхчаншиву ва бучIантIимур цуксса лахъсса кьиматран дацIлай дуссарив.
Къуртал хьунни мероприятие Вирттаврал чIирацI ва Буттал КIанттул цIанийсса Хъун дяъвилия зана къавхьуминнансса гьайкалдануцI тIутIив дишаврийну.
